GIPADAYAG ni Bohol Provincial Police Office (BPPO) director Colonel Lorenzo Batuan nga “100 percent” siyang segurado nga walay bisan usa sa lokal nga pwersa sa kapulisan ubos sa iyang pamunuan ang adunay kalambigitan sa illegal nga drug trade.
Si Batuan mihimo sa maong pamahayag sa usa ka interbyu sa radyo karoig bag-o taliwala sa paningkamot sa nasudnong kagamhanan sa paglimpyo sa Philippine National Police (PNP) sa drug ties.
“Ang atoang team karon, ang atoang mga pulis sa Bohol clean ta sa pagkakaron,” matod ni Batuan.
Si Batuan, ang unang lumad sa Bohol nga nangulo sa Bohol Police Prov’l. Office (BPPO) sulod sa labing menos usa ka dekada, niangkon nga ang lokal nga kapolisan natangtang na sa bisan unsang kalambigitan sa patigayon sa narcotics.
Matod ni Batuan, medyo maayo ang performance sa probinsiya sa pagsumpo sa ilegal nga drugas kumpara sa ubang lokalidad sa rehiyon.
Matod niya nga 627 sa 1,109 ka barangay sa probinsiya ang nadeklarar na nga “drug-cleared.”
Ang taas nga opisyal sa BPPO miigon nga ang mga ilegal nga droga sama sa methamphetamine hydrochloride o shabu wala gihimo sa lokal.
Sama sa mga police director nga nauna niya, nagtuo si Batuan nga ang supply sa shabu nga moabot sa Bohol gikan sa silingang probinsya sama sa Cebu ug Leyte.
Sa iyang paglingkod sa timon sa BPPO niadtong Nobiyembre sa miaging tuig, si Batuan nitataw nga ang iyang kampanya batok sa drugas magtutok sa pagkunhod sa suplay sa drugas nga makasulod sa Bohol.
Giangkon niya nga ang pagpatrolya sa lapad nga baybayon sa isla nga probinsya mahimong lisud nga buluhaton tungod sa kakuwang sa mga personahe, apan namatikdan nga mahimo kini matubag pinaagi sa pagpangayo og tabang sa mga opisyal sa barangay ug mga residente sa mga baryo sa baybayon.
Sa sayo pa, si Interior Secretary Benjamin Abalos nipasangil nga ang mga paningkamot sa mga awtoridad sa pagsumpo sa drugas nababagan tungod sa pagkalambigit sa pipila ka dagkong opisyal sa kapolisan sa narcotics trade.
Ang iyang solusyon mao ang pagtawag alang sa courtesy resignation sa mga top brass sa PNP partikular na sa mga koronel ug mga heneral aron mahatagan og dalan ang pagsusi ug pagtuki sa gobyerno sa mga
Sa pagkakaron, dul-an sa 600 ka mga koronel ug mga heneral, apil si Batuan, ang nihatag sa ilang courtesy resignation.
Matod sa labawng polis sa probinsiya nga nagtuo siya nga duna gyuy mga top brass police officials nga nalambigit sa illegal drug trade.
Dugang pa niya nga ang inisyatiba ni Abalos posibleng mosangpot sa pagpasaka og kaso batok sa pipila ka mga opisyal sa kapolisan.
“Akong nakita na aduna juy mga third-level officers siguro pud na ma file-an og kaso tungod sa ilang involvement sa illegal drugs,” sumala ni Batuan. (RTB)
