DAGOHOY, Bohol — Wala na’y kinabuhi nga nakit-an ang lawas sa usa ka biyudo nga naanud sa sapa gumikan sa kusog nga baha kaniadtong Merkules, Enero 11, sa taytayan tali sa Brgy. San Miguel ug Brgy. Babag sa lungsod sa Dagohoy.
Ang patay’ng lawas sa biktima nga si Catalino “Lino” Reponte y Guadalquiver, 59 anyos, usa ka panday, napalgan gahapon sa buntag (Enero 14) sa sapa duol sa Purok Cabatuan sa maong lungsod.
Sa imbestigasyon sa kapulisan, padulong ng mouli ang biktima sa dihang nipugos sa pagtabok sakay sa iyang motorsiklo nga niagi sa spillway ug naanud sa kusog nga baha.
Sa pagpangita sa biktima, niabag si Gob. Aris Aumentado pinaagi sa pagpadala sa TaRSIER 117 aron motabang sa rescue teams sa Dagohoy LGU Rescue Teams nga mao ang MDRRMC, BFP, PNP ug DREAM (Dagohoy Response to Emergency, Assistance and Monitoring) Team.
Nipaabot sa pahasubo si Mayor Relampagos ug ang LGU-Dagohoy sa pamilya sa biktima. (Wilson Auguis Subrio)
