Ni: Wilson Auguis Subrio
TALIBON, Bohol — Nahugno ang porsyon sa parking area sa Philippine Port Authority (PPA) sa lungsod sa Talibon mga ala una sa kadlawon kaniadtong Merkules, Enero 11. Ang parking area nga nahugno nahimutang duol sa entrance sa maong port.
Matud ni Venus R. Garnica, Division Manager, PPA-Talihon, ang Bagyong Odette nga nadugangan sa bawud maoy nakaangin sa pagkaguba sa maong parking area.
“Kahibawo na man g’yud ta sir nga Bagyong Odette maoy nakaguba sa wall niana, unya nakankan ang sand and gravel. Ang bawud maoy hinungdan (sa pag-collapse) niana,” butyag ni Garnica sa dihang nahinabi niining tigbalita, Enero 12.
Gipangatarungan ni Garnica nga dugay ra silang nipasa og mga rekomendasyon sa ilang buhatan sa kaulohan apan nakadugay niini ang wala nipabor nga mga sirkumstansya.
“Nahitabo ang (Bagyong) Odette sir Disyembre baya to, year-end. Unya nag-election ban. Na-pending. Unya bag-ong administrasyon. Bag-ong set of officers,” suma ni Garnica.
“Kahibawo na man ta basta gobyerno daghang proseso. Dugay,” dugang niini.
Niingon si Garnica nga nagpaabot pa ang PPA-Talibon sa pundo gikan sa nasudnong panudlanan aron ma-rehabilitate ang nadanyos nga parking area.
“Naghuwat pa mi sa approved project and budget. Posible nga atong mapasugdan ang atong pagrehabilitate sa port of Talibon karong tuiga. Priority ni nga proyekto,” dugang pa niya.
Samtang giangkon ni Garnica nga naguol siya sa Facebook post sa usa ka netizen mahitungod sa nahugnong parking area diin gitusak-tusak sa netizens sa pagsaway ang PPA-Talibon.
Nihangyo usab si Garnica nga dili magpataka og post sa social media kabahin sa maong panghitabo kay ilang gibuhat ang ilang makaya aron mapadayon ang pagserbisyo sa katawhan.
Matud ni Garnica, gisugdan ang kontraksiyon sa maong port kaniadtong Oktubre 30, 2018 ug nahuman kaniadtong Oktubre 18, 2019 diin ang pundo naggikan sa PPA.
Ang kantidad sa maong proyekto P27, 676, 028, 61.00 nga gi-contract sa Bemkar Construction.
Sa pagka-karon, ang mahimo sa PPA-Talibon mao ang paghatag og pahimangno sa mga moagi nga dili na pa-parkingan ang duol sa nahugno.
