PILAR, Bohol — Naguba ang tulay sa Brgy. Pamacsalan sa lungsod sa Pilar kaniadtong Merkules, Enero 11, tungod sa walay hunong nga uwan nga mugna sa low pressure area (LPA) nga nagpauwan sa daghang parte sa nasud.
Kini ang gitaho sa Facebook Page sa lungsod sa Pilar (LGU-Municipality of Pilar) kaniadtong Biyernes, Enero 13.
Sa maong post usab gipakita nga gisugdan dayon og trabaho sa mismong adlaw ang nahugnong tulay.
Gitrabaho sa DPWH Third District nga gipangulohan ni Engr. Magiting Cruz ug sa Provincial Engineering nga gipangulohan ni Engr. Rey Casten Caadlawon ang nahugnong tulay.
Matud ni Pilar Mayor Engr. Wilson Lagapa Pajo sa usa ka text message nga gipaabot niining tigbalita, naayo na ang maong tulay ug nagamit na kaniadtong Biyernes sa hapon.
Nagpasalamat si Mayor Pajo sa Barangay Pamacsalan Officials nga gidumala ni Kapitan Geronimo Tutor ug sa tanan nga mga volunteers.
Nagpasalamat usab si Mayor Wilson sa amahan sa lalawigan nga si Gob. Aris Aumentado kinsa ni-sorpresa sa pagbisita sa maong tulay ug sa buhatan sa mayor dala ang mga food packs alang sa mga Pilarnon nga nagtapok sa evacuation center.
Matud ni SB Member Edgar Auguis Doydoy, ang maong tulay gihimo sa kompanya nga Hanjin sa dihang gihimo ang Malinao Dam. (Wilson Auguis Subrio)
