KINING maong isyu, nahimong dako kaayong istorya panahon sa pandemya sa COVID-19, kon nakahinumdom pa mo. For sure, kahinumdom mo ilabina ang mga “Marites”.
Kadaghanan sa mga Bol-anon supak sa planong pagpalit og mga sakyanan sa 14 ka mga sakop sa Sangguniang Panlalawigan (SP) sa niaging administrasyon.
Kaniadtong panahona, ang karon Bise-Gobernador Victor Balite mao pa ang Senior Board Member sa SP ug maoy numero-unong nisupak sa maong lakang.
Karon nga siya na ang bise-gobernador, mao na’y numero-unong niuyon nga mopalit sa maong sakyanan nga nagkantidad og kapin P23 milyones.
Matawag nga na-‘justified’ ni VG Balite ang iyang lakang. Simpol ra ang tubag: nakalingkawas na sa grabeng kalisod ang Kagamhanang Probinsyal kompara panahon sa pandemya sa maong kagaw.
Ang iyang pagbabag kaniadto tungod kay wala pa kabarug ang Bohol sa maong krisis.
Karon nga mahinayon na ang pagpalit sa maong mga sakyanan, ang mga dumadapig sa Oposisyon maoy nagsige og yawyaw sa social media, nga kuno, sobra sa presyo ang gipangpalit nga mga sakyanan.
Apan si Balite nidepensa ug gisegundahan ni Provincial Legal Officer Atty. Handel Lagunay nga walay ‘overprice’ sa 14 ka mga sakyanan alang sa 14 ka mga bokal sa Bohol.
Kini giklaro sa usa ka press conference nga gihimo sa Kapitolyo sa niaging semana.
Ang mga pasumangil nag-ingon nga ang 14 ka Nissan pick-up anaay presyo sa merkado nga P1.3 milyones apan gipalit og mas taas nga P1.6 milyones.
Si Lagunay niingon usab nga ang maong pagpamalit gipaagi sa sakto nga proseso sa BAC sa wala pa kini gi-award.
Nideklarar usab si Balite nga walay binuang sa maong pagpalit kay ang pundo nga gigamit mao ang orihinal nga gi-aprobahan sa karaang SP ilawom sa bise-gobernador kaniadto nga si Rene Relampagos, ug migamit sa parehong kantidad nga gigahin.
Kahinumduman nga ang kanhi administrasyon nigahin og P23,099,000 alang sa 14 ka mga sakyanan nga nagkantidad og P1.6 milyones matag usa.
Nidugang si Balite nga ang bag-ong administrasyon ni-implementar lang sa na-aprobahan sa kanhi rehimen.
Ug wala usab kuno’y anomalya nga mahitabo kay ang pagbayad sa pagpalit sa maong bag-ong mga sakyanan adto kuhaon sa provincial treasurer’s office (PTO) ug dili ngadto sa mga bokal.
Gitug-an usab ni Balite nga wala ni usa ka bokal ang nibabag o nikwestyon sa maong lakang ilabina ang taga-Oposisyon kay nagkasabot ang tanan sa panginahanglan nga makabaton og bag-ong sakyanan aron maserbisyuhan ang ilang trabaho isip mga magbabalaod.
Maong sa mga nagsige pa og yawit diha, end of the story na. Abante na kita sa laing pahina sa SP, sa Kapitolyo ug sa Bohol.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
