MOKABAT sa 14-ka mga indibidwal lakip na ang kanhi bise mayor sa Tubigon ang nasikop atol sa pagpangronda sa usa ka cockpit arena sa nahisgutang lungsod nga giingong nisangpot sa pagkaangol sa pipila ka mga tumatan-aw ug mga partisipante nga miikyas ug nakalikay sa pagkasikop.
Matod ni Lt. Col Jomar Pomerejos, hepe sa Provincial Intelligence Unit (PIU) sa Bohol Provincial Police Office (BPPO), nga ang sabong nga gipahigayon sa Tubigon Cockpit nakalapas sa Presidential Decree No. 449, ang balaod nga nagdili sa ilegal nga sabong.Lakip sa nasikol mao ang kanhi bise mayor sa lungsod nga si Virgilio Fortich, kinsa gikatahong tigpasiugda sa maong kalihukan.
Matud pa ni Pomerejos nga ilegal ang maong sabong kay gihimo kini niadtong Lunes, Enero 2, 2023 nga paglapas sa PD 449 diin naglatid nga ang maong kalihukan mahimo lang ipahigayon sa adlaw nga Domingo ug “legal holidays.”
Apan, si Tubigon Mayor William Jao nitataw nga ang mga organizers wala magkinahanglan og permit sa pagpahigayon sa maong kalihukan sanglit gihimo kini niadtong Enero 2, 2023 nga gideklarar ni Presidente Ferdinand Marcos, Jr. isip dugang special (non-working) day.
Si Jao, kinsa sakop sa Tubigon United Cockpit Corporation (Tucic) nga nanag-iya sa cockpit arena, nidugang nga ang maong pasilidad adunay papeles.
Base sa Administrative Code of 1987, nga giamendar sa Republic Act 9492, ang listahan sa “Regular Holidays and Nationwide Special Days” mahimong usbon pinaagi sa balaod, order o proclamation.
Sa kaso sa Enero 2, 2023, kini gideklarar ni Marcos nga usa ka espesyal (non-working) nga adlaw pinaagi sa Proclamation No. 90 nga gi-isyu niadtong Nobyembre sa miaging tuig.
Gikasubo usab sa lokal nga hepe ehekutibo ang paagi kung giunsa gihimo ang raid.
Matod ni Jao nga ang kalit nga pag-abot sa PIU nakapahadlok sa pipila ka mga tawo sulod sa cockpit arena hinungdan nga pipila sa mga nangagiw miambak sa bungbong ug nakaangkon og mga samad sa barbed wires ug mga putol nga botelya.
Dugang pa ni Pomerejos nga ang piskaliya o ang korte na ang modesisyon kon aduna bay merito ang panaglalis sa mayor kalabot sa pagpasabot sa legal holiday. (RTB)
