PADAYON nga mibuhagay ang mga tabang ngadto sa mga biktima sa dakong sunog sa Poblacion 2 ning siyudad sa Tagbilaran kaniadtong Disyembre 23, 2022.
Si kanhi Cooperative Development Authority Administrator Benjie Oliva, iyang asawa nga si Atty. Joan Jagonos-Oliva kauban ang Rotary Club of Pasay Cyber City, Metrowalk Eagles Club nga gipangulohan ni Gil Montilla ug Elmer Taldo ang nanghatag og school supplies sama sa bag ug uban pa niadtong Martes, Enero 3, 2023 ngadto sa 69 ka mga bata nga biktima sa maong trahedya.
Wala pay labot niini ang gihatag sa pamilya ni Oliva niadtong Disyembre 31, 2022 nga P50k nga salaping cash.
Gawas pa niini, si Konsehal Atoy Torralba nga ang mihatag pa gyud og tabang ngadto sa mga biktima.
Gisaad usab ni Oliva nga iyang tabangan si Grey Manzano, ang nailo nga bata nga anak sa magtiayong Remedios ug Edgar Manzano nga namatay sa sunog, aron makaeskwela hangtod sa kolehiyo.
Motabang usab si Oliva sa kagamhanan sa siyudad sa pagpangeta og pondo alang sa kapuy-an sa mga biktima.
Una na usab niini, ang grupo ni Oliva nanghatag usab sa bag ug ubang school supplies sa kabataan sa Catigbian Central Elementary School sa lungsod sa Catigbian apil na ang kabataan sa Cogon Elementary School ning syudad sa Tagbilaran. (RTB)
