KON ana-a may mura kuno og bulawan ang presyo, mao ang presyo sa sibuyas (o bombay) dinhi sa Pilipinas ilabina dinhi sa lalawigan sa Bohol.
Ana-a sa P600 ang presyo sa matag kilo sa bombay sa mga kamerkaduhan sa Pilipinas.
Gani, ang maong presyo nagtrending sa social media.
Sa ubang lugar kuno gani dinhi sa nasud, moabot og P700-800 ang matag kilo.
Usa ka sakop sa media sa Bohol ni-post sa social media sa giingong mga presyo sa sibuyas sa pipila ka mga nasud sa kalibutan. Ug ang nidaug sa grabe ka mahal, ang Pilipinas.
Nahimo kining kataw-anan alang sa uban. Kataw-anan nga reyalidad.
Sa hulagway nga nigawas sa social media, makita ang ka-barato sa ubang bombay o sibuyas sa laing mga nasud. ‘Converted’ na kuno kana sa Philippine peso.
Kadaghanan kanato ilabina kanatong mga Pinoy, hilig og lamas o panakot. Ug lakip niana ang sibuyas aron mo-lasa o mo-lami ang giluto nga pagkaon.
Sama sa ahos, ang sibuyas kumon nga gamit sa pagluto ilabina kon gamitan og mantika ang usa ka putahe.
Ana-a ang tambag nga minus-minusan ang paggamit sa sibuyas. Ang uban mogamit na lang kuno og ‘seasoning’ kay ana-a na’y bombay nga giapil.
Nimahal og ayo ang presyo sa sibuyas dinhi sa Pilipinas tungod sa mga ‘hoarders’ nga nagtago o nagpugong sa mga sibuyas. Wala gibaligya. Anaay ‘hoarding’ nga nahitabo. Anaay sindikato mga nagpaluyo.
Suma sa usa ka netizen nga nagpost sa social media, daghang mga gipangtaguan nga sibuyas nga nanurok ug nangalata na. Gitaguan aron mo-mahal ang presyo.
Daghang napungot niini. Ang uban niingon nga “merisi”. Apan dili pa kompirmado kon ang maong hulagway sa mga bombay nga nanurok ug nangalata karon ba’ng tuiga o sa 2022 nahitabo.
Anaay usa ka netizen nga anaay maayong tambag. Gawas sa tambag sa uban nga minusan ang paggamit sa sibuyas, ‘dili’ na lang gayud kuno mogamit og sibuyas aron mapugos og baligya ang gipangtaguang sibuyas sa mga negosyante nga mapahimuslanon sa kahigayonan.Karon kay taas man kaayo ang presyo sa sibuyas, mopalit pa ka o dili na?
Ug unsa may gibuhat sa atong gobyerno aron kini masulbad?
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
