“SA Diyos ang tanan mahimo”. Kini ang mensahe ni Tagbilaran Bishop Abet Uy atol sa iyang homiliya sa New Year’s Eve Mass sa Saint Joseph the Worker Cathedral kagahapon Disyembre 31, 2022, ang katapusang adlaw sa tuig.
Si Uy, nga nagsaulog sa misa kauban ang ubang mga pari sa diyosesis, nagsulti sa iyang homiliya nga adunay mga maayong butang nga angay huwaton sa 2023 tungod kay ang Diyos makahimo sa mga katingalahan.
Giawhag niya ang mga magtutuo nga magpadayon sa paghimo og mga resolusyon bisan kung sila mapakyas tungod kay dili kini usa ka timaan sa pagkapakyas kung dili kita molampos sa pagkakaron.
“Bisan sa atong kahuyang ug kasaypanan naa sa atong kasingkasing nga masusab ug mahimong matarung. Kay ngano? Matud ni San Pablo kay diha sa kasingkasing sa matag tawo nahisulat ang balaod sa Diyos,” miingon ang Obispo.
“Busa ning tuig nga bag-o, dasigon mo nako nga magpadayun ta sa paghimo og mga resolutions. Hangyuon nato ang Diyos diha sa atong mga pag-ampo nga iya tang tabangan nga mahimo tang buotan. With god all things are possible” dugang ni Bishop Abet.
Giingon niya nga pinaagi sa mga kasinatian ug kapakyasan sa pagtuman sa mga resolusyon sa bag-ong tuig, mabati nato ang atong panginahanglan sa Diyos.
“Dili nato kaya buntogon ang mga temptasyon. Dili nato kaya nga mahimong matarung. Busa ning tuig nga bag-o dasigon mo nako nga magpadayun ta sa paghimo og mga resolutions. Hangyuon nato ang Diyos diha sa atong mga pag-ampo nga iya tang tabangan nga mahimo tang buotan. With God all things are possible,” sigon niini.
Gihagit niya ang mga magtuu nga mahimong tigpasiugda sa kalinaw, magsulti ug mag-atiman sa kamatuoran ug nag-atiman.
Giingon niya nga kinahanglan natong masabtan nga ang makahimo sa tanan nga mga butang pinaagi kang Kristo nga nagpalig-on kanato nagpasabut nga kinahanglan kita magpadayon sa pagsalig sa iyang kusog aron mahimo ang tanan nga mga butang ug mapadayon ang tanan nga mga resolusyon.
Giasoy ni Bishop Uy nga ang Bag-ong Tuig napuno sa mga pag-ampo ug paglaum nga matapos na sa hingpit ang pandemiya. (RTB)
