BISAN pa nagpadayong krisis karon, ang padayon nga pagtinabangay ug panaghiusa sa matag banay ang gipanghinaot ni bise-gobernador Dionisio Victor A. Balite sa tanang katawhan ning pagsugod sa bag-ong tuig 2023.
Matud ni Balite nga sa nakalabay duha ka mga tuig daghang mga bati nga nasinati ang mga Bol-anon ug nasud apan nagpabiling lig-on tungod sa pagtinabangay ingon man pabilin ang panaghiusa aron pagbuntog sa dili makita nga kontra.
Gitataw ni Balite nga sa iyang bahin andam gihapon siya nga moserbisyo sa tanan kutob sa iyang mahimo tungod kay dili ikalimod nga limitado usab ang iyang mabuhat.
Gipadayag sa ikaduhang labing-labaw nga opisyal sa Bohol nga ang iyang pagtabang magdepende lang gyud kini sa kahitas-an nga maoy magbuot sa tanan.
Si Balite nanghinaot nga unta magmalipayon ang tanan niining Bag-ong Tuig 2023 ingon man kompleto ang matag pamilya ug layo sa disgrasya.
Dugang pa sa opisyal nga unta magmalinawon ang matag pamilyang bol-anon ug iyang giampo ang tanan nga dugang grasya pa unta ang muabot. (RTB)
