MOPAHIGAYUN og massive operations ang Tagbilaran City Traffic Management Office (CTMO) batok sa mga badlungon nga drayber.
Kini human niingon si CTMO operations officer Tony Samante nga adunay kapin kon kulang 500 ka mga ‘erring drivers’ ang na-isyuhan og bench warrant sa niaging tuig.
Sigon ni Samante nga tunga sa 500 ka bench warrants ang na-serve sa mga drivers ug ang katunga niini ilang paningkamutan nga ma-serve sa mga badlungong drayber.
Matud niya nga wala maasikaso sa CTMO ang pag-serve sa bench warrants sa niaging tuig tungod nag-focus sila sa traffic management sa siyudad sa Tagbilaran.
Gipasabot ni Samante nga masulbad ang trapiko sa siyudad sa Tagbilaran kun tanang mga draybers motuman sa balaud.
Tinguha sa CTMO karong tuiga nga mokunhod ang mga draybers nga maisyuhan og citation tickets maong ilang panghingusgan ang ilang kampanya batok sa mga badlungon.
Matud ni Samante nga kining mga drayber maisyuhan og bench warrant kun mapakyas sila pag-settle sa ilang mga violations human ma-isyuhan og citation ticket.
Awhag niya nga mas maayong moduol ang mga drayber nga nalutsan og citation ticket sa mga traffic enforcers aron malikayan nga mapasakaan og kaso sa CTMO. (RTB)
