MIPASIDAAN ang pangulo sa komitiba sa turismo sa Sangguniang Panlalawigan (SP) sa mga ginikanang Bol-anon nga unta dili magpatintal sa silaw sa kwarta unya ang ilang mga anak na maoy ilawog ngadto sa mga turista.
Sumala pa ni SBM Tita Baja nga mas mudagsa pa unya ang mga turistang langyaw dinhi tungod kay giwagtang naman ang mga kaniadto nga ‘restrictions’ pasulod sa lalawigan alang kanila human sa pipila ka tuig nga pagkasirado tungod sa pandemya.
Hinuon dili tanang langyaw ang mohimo og mga kalapasan sa balaod o mangmolestiya og mga bata o mga babaye, sigon niini.
Apan mao kini ang pasidaan ni Baja karong panahuna tungod kay gilauman nga daghang mga langyaw nga turista ang mobakasyon nganhi sa Bohol.
Matud pa sa labaw nga bokal sa Bohol nga daghan pang ginikanan ang wala pa makaamgo ug migamit sa ilang mga anak sa ‘cyber pornography’ tungod kay alang kanila ang pagkuha o hulagway sa ilang mga anak nga hubo wala kini dautang epekto.
Dugang ni Baja nga ang maong mga ginikanan naghuna-huna lang kini sa sayon ug dali nga kwarta ug wala nila huna-hunaa nga maguba ang dignidad ug kaugmaon sa ilang mga anak.
Nagkanayon usab si Baja nga ang kapolisan kinahanglang ipaubos sa mga bansay-bansay kabahin sa pag-detect sa ‘cyber pornography’ ug pagpreserba sa mga ebidensiya. (RTB)
