TUNGOD sa walay hunong nga operasyon sa kasundalohan batok sa New Peoples Army (NPA), subling nagkasugat ang dalan sa duha ka habig nga misangko sa panagsangka sa Sitio Bajong, Barangay Baunos sa lungsod sa San Isidro.
Nagkasinukliay og bala pasado alas 10:00 sa buntag kaniadtong Disyenbre 28, 2022 ang pwersa sa 47th Infantry “Katapatan” Battalion ug kapin kun kulang 10 ka mga miyembro sa rebelde nga sakop sa Bohol Party Committee-Komiteng Rehiyon Cebu Bohol Negros Siquijor (BPC-KRCBNS).
Matud ni 2Lt. Charmaine Sancho, Civil Military Officer sa 47th IB, nga walay nakalas sa panig sa mga tropa sa gobyerno ug sa NPA. Hinuon, adunay nahipos nga mga gamit gikan sa mga rebelde.
Nisuway ang mga rebelde dinhi sa lalawigan pagbangon sa ilang pwersa apan wala molampos tungod sa tabang sa mga katawhan. (RTB)
