GIAPRUBAHAN sa Kamara ang sugyot balaodnon nga nagmando sa tanang kan-anan sa pagdonar sa wala mahalin nga pagkaon ngadto sa usa ka charity institution.
Sumala sa labing una nga babayeng Kongresista sa Segundo distrito Vanvan Aumentado nga ubos sa ‘Food Surplus Reduction Act’ kinsa usa siya sa misuporta niini, nga gipasar sa ubos nga hawanan sa kongreso kaniadtong Dec. 14 pagkahuman gipasa dayon kini sa Senado.
Dugang niini nga sakop sa nasangpit nga lakang mao ang restaurants, diners, fast food chains, hotels, food manufacturers, supermarkets, ug mga culinary school.
Gipasabot ni Aumentado nga ang lakang nagtinguha sa husto nga paggamit sa tanang magamit nga kinanglanon sa nasud pinaagi sa pagdili sa mga negosyo gikan sa paglabay sa makaon nga pagkaon ug pagmando kanila nga idonar ang wala mahalin nga mga produkto ngadto sa mga charity institutions.
Gipadayag usab sa kongresista nga mukabat sa 7.6 milyon ka mga Pilipino ang nakasinati og kagutom sa ikatulo nga kwarter karong tuiga human miigo ang COVID-19 nga miresulta sa pagkawala sa daghang mga trabaho base sa SWS Survey kaniadtong Setyimbre. (RTB)
