LIBO-AN ka mga pelikula ang makita sulod ug gawas sa Netflix. Apan ania kita karon ning panahon sa Internet diin daghang fake news, paglingla sa masa, pinahilunang misinformation ug grabeng pagpamakak sa mga authoritarian leaders sa daghang nasud. Angayan gyud nga kamao ta motuki og hain ang bakak o makatuoran.
Makapalambo sa atong kahimatngon ang pagtan-aw sa mga cine nga makapa-abli sa atong hunahuna, makapukaw kanato gikan sa paghikatulog. Dili kadtong mga cine nga pulos lang pinusilay, dinunggabay ug hubo-hubo nga makapahikalimut kanato sa mga importanteng isyu sa katilingban. Mga cine nga maoy gustong ipakita kanato sa mga diktador ug kawatan sa panudlanan sa gobyerno nga gustong mahikalimut kita sa ilang mga binuhatan ug sa kamatuoran sa global climate crisis.
Gatusan usab ang mga nindot nga pelikula nga maka-edukar kanato kabahin sa kamatuoran sa atong kahimtang sa ekonomiya, politika ug kultura. Adunay 18 kabuok niini nga atong hisgutan karon. Sulayi pagtuki.
Nag-una niini mao ang pelikulang nag-ulohan og, The Social Dilemma. Sa imaging tuig dihay gibalita nga mga estudyanteng nabiktima sa paggamit sa educational modules. Di pa kana mao ang labing lawom nga problema nga gidala sa Internet. Duna pay mas grabe niana. Ang cine nga Snowden nagbutyag sa kaagi ni Edward Snowden, usa ka kanhi IT expert ug intelligence officer sa USA nga misumbong kung giunsa nila pagpanamastamas ang atong mga pribadong katungod.
Kung seryoso ka sa imong pagka-Catolico ug nagpakabana ka sa kalibutan, tan-awa gyud ang The Two Popes, ug Pope Francis: A Man of his word. Kung gusto pa gyud kag mas lawom nga pamalandong, tan-awa ang, I Am. Matud sa maong pelikula duha lang ang pangutana nga angay tubagon sa atong kinabuhi: unsay suliran sa atong kalibutan ug unsay atong mahimo aron kini masulbad?
Kung gusto usab kitang masayud kon duna pa bay paglaum sa natad sa politika, tan-awa ang Knockdown the House ug The Edge of Democracy. Dinhi gipakita nga may paglaum pa ang demokrasya bisan pa man sa malinglahong pamulitika ni Donald Trump ug mga lideres nga susama kaniya nga dili halayo kanato.
Ang labing dakung suliran nga gusto sa mga promoters sa pandemia nga atong hikalimtan mao ang Global Climate Crisis. Ang pelikulang, The Inconvenient Sequel, mibatbat sa kamatuoran nga naglimin niining maong isyu.
Ang Saudi Arabia Uncovered mihukas sa mga dautang laraw nga nagpaluyo niining ginharian sa lana. Ang Saving Capitalism mo-edukar kanato bahin niining ekonomikanhong sistema diin ang mga pobre misamut ka-pobre ug ang mga dato misamut usab ka-dato. Ang Barry ug Becoming nag-asoy sa kaagi ni Barrack ug Michelle Obama og giunsa nila pag-asenso from rags to riches.
Ang Cowspiracy, What the Health, ug Heal mobukas sa atong hunahuna kabahin sa mga food ug health issues. Samtang ang The Little Prince, Raising Dion, The Boy Who Harnessed The Wind, ug The Kindness Diaries, makapadasig sa atong pagtuo, paglaum ug gugma. Tana manan-aw na ta, alang sa Makahuloganong Bag-ong Tuig!
