MGA panghinaut sa usa ka Madagaya-ong Bag-ong Tuig sa atong mga suking magbabasa niining lindog. Unta ihatag kanunay ang katumanan sa atong mga damgo ug pangandoy sa kinabuhi. Ang milabay nga tuig nagdalag daghang mga pagsuway ug hagit nga nakapalig-on sa atong kaugalingon. Naghatag ug daghang mga pagtulun-an ug kasinati-an nga sarang kapanaminan sa panahon nga kita mohimo ug mga hukom sa mga butang nga atong pagabuhaton. Ang mga nanglabay naghatag kanato ug kalig-on sa pakigbisog nga maoy nagdala ug kamabulokon nga pagpakabuhi. Nahimo kining tamdanan ug basihan sa mga huyang ug lig-on sa atong kaugalingon.
Dili tiaw ang gihimo natong paningkamot. Dili sayon buntogon ang mga hagwa ug lingla nga maoy dakong babag sa mga bakigbisog. Ang kabug-at sa mga suliran nga atong gisagubang nahimong nakapatalaw ug nakapatagam alang sa dugang paningkamot. Apan luyo niining tanan, anaa pa gihapon ang kaikag nga ipadayon ang mga nasugdan na natong pagbaklay paingon sa unahan. Pamasin nga sa luyo ni-anang mga ambogon ug tukaron, nagpahipi ang kaban sa mga bulawan nga atong gihandum. Ang mga pagbugtaw dili mahimong wagtangon tungod kay pinaagi lamang niini nga makaplagan ang dugay na natong gilantaw nga kalamposan.
Pagkanindot kaha nga maka-angkon ug mga kabtangan. Mga kalibotanong bahandi nga maoy nakahatag ug kahungog sa daghan. Ang silaw sa salapi maoy nahimong lamdag nga gidugok sa kadaghanan sa ilang pagtoo nga kini maoy kalipay niining kalibotan. Dili ug walay mabasol sa maong pagtuo ug baroganan. Mao kini ang haum nga sulbad sa tanang panginahanglan. Mga kalibotanon nga pangagpas aron matagbaw ang lawasnong gikinahanglan. Mga butang nga gihimong dayandayan ug gani maoy gi-ampoan. Kalibotanon gayud tungod kay ang tawo nagagikan sa abog. Padayonon nato ang mga paghanduraw ilabi na kay sakay na kita sa tuig 2023.
Bag-ong tuig ug bag-ong kinabuhi. Mao kini ang unod sa mga paskohanong singgit ug sing-aw sa mga kabataan ug hamtong. Nunot kini sa pagsaulog sa pagkatawo sa Anak sa Dyos nga nagpakatawo. Katumanan sa gisaad nga kaluwasan human sa pagpakasala sa tawo. Ang mga kabataan mahimong dili mohatag niini ug tukmang gibug-aton. Apan ang mga hamtong angayan nga sabton ang kahulogan sa giingon nga gasa sa kaluwasan. Ang kinabuhi niining kalibotan lumalabay lamang. Mobalik sa abog ang gikan sa abog. Adunay giiingon nga ikaduhang kinabuhi human sa kamatayon. KInabuhing langitnon ug kinabuhing impyernohanon.
