SI Gobernador Aris Aumentado mibuhos sa ayuda alang sa mga biktima sa sunog sa Poblacion II, Tagbilaran City niadtong disyembre 23, 2022.
“Niduyog mi sa ilang gibati, mao nga muhatag ang Kagamhanang Probinsyal ug Php10,000 sa matag pamilya nga naapektuhan, dugang pa sa gipanghatag na packs pinaagi sa OPSWD. Ato usab hatagan og Php30,000 ang mga namatyan, ug i-distribute ang 200 ka mga boxes of goods gikan sa NGCP,” matud sa gobernador.
Ang gobernador mimando sa Office of the Provincial Social Welfare and Development (OPSWD) ug gipang-apod-apod ang 200 boxes sa pagkaon nga gidonar sa National Grid Corporation of the Philippines (NGCP).
Kini human sa iyang pagbisita sa mga nasunogan didto sa evacuation center sa maong barangay, diin iyang nakita ang kahimtang sa naha-una.
Tulo ang patay sa naasoyng sunog, (usa ka amahan, inahan ug anak nga naggakos) nahipalgan human sa sunog. Ang anak niini nga lalaki wala sa ilang balay niadtong tungora kay didto natulog sa simahan aron makasilbi sa misa de gaallo sa kadlawon.
Nailhan sa kapolisan ug mga bombero ang mga patayng lawas mao sila si Edgar Manzano, 56; Remedios Baluca, 52; ug 10 anyos nga anak, Meyer Manzano.
Ang apektado sa sunog naglakip sa 75 ka mga banay o 321 individuals, 13 senior citizens, tulo ka persons with disability (PWD), tulo ka buros, tulo ak mga bata ug 60 ka mga batang nag-eskwela na.
Ang damyos sa sunog mikabat sa P3 million, matud ni City Fire marshal Bradpitt Lopez.
Matud ni police officer Josefino Hinlayagan nga nailhan na ang mga “persons of interest.” Ang “persons of interest” dili mga suspek, apan, dako ang ilang ikatabang sa gilusad nga imbestigasyon, si Hinalyagan midugang. (rvo)
