SUBLING gibaharan sa Bohol Police Prov’l. Office (BPPO) ang mga pulis sa Bohol batok sa pagpabuto sa ilang armas atol sa pagsaulog sa Pasko ug pagsugat sa bag-ong tuig.
Matud sa BPPO nga gawas sa pagka-tang-tang sa ilang serbisyo, mag-atubang sa bug-at nga kaso ang mga pulis nga mapamatud-ang nalambigit sa indiscriminate firing.
Gisuportahan usab sa BPPO direktiba sa ilang labaw sa PNP sa nasud nga kinahanglang kanunay ‘visible’ kon makit-an ang mga pulis nga gi-deploy sa mga publikong lugar aron mamahimo silang ‘deterrent’ kon babag sa mga dautang elemento.
Samtang nanghinaut usab ang Bohol Prov’l. Health Office (PHO) nga magpadayon ang ilang natalang ‘zero firecracker related injuries’ hangtud sa pagsugat sa bag-ong tuig.
Matud ni Dr. Reymoses Cabagnot, hepe sa PHO nga gikan sa pagsugat sa pasko kagabie hangtud ning panahuna, walay tawo nga nabuthan ug firecrackers nga nadala sa mga balay tambalanan sa tibook syudad ug lalawigan.
Nagpakita lamang matud pa kini nga misanong ang publiko sa ilang gilusad nga ‘oplan iwas paputok’.
Alayon niini, nagpasalig si Cabagnot nga ila pang hugtan ang kampaniya batok sa mga dagkong pabuto aron walay mga tawong mabiktima niini atol sa pagsugat sa bag-ong tuig. (RTB)
