ANG hunahuna sa tawo mahimong maoy modiktar sa mga butang nga gisanasana nga himoon. Gani sa mga higayon nga padayon ug gisugdan na ang pagtuman ug pagpatuman niini, daghang higayon nga dili pa gihapon kini masunod. Adunay motumaw nga mga pagduda gikan sa hunahuna nga bunga sa mga pangagpas nga dili apil sa gihimong mga laraw. Kusog kaayo kini nga makababag sa atong mga gimbuhaton. Angayan kini nga bantayan kay kon mao ang mopasulabi ug masunod, mosangpot gayod ug pagkasipyat. Ang naka-apan kay dili mag-una ang pagmahay. Angayan nga piho gayud ang atong buhaton sibo sa gilaraw nga kab-oton.
Daghang higayon nga init kaayo ang atong hunahuna sa mga plano ug lakang. Dili usab kalikayan ang mga higayon nga mabugnaw ang hunahuna tungod sa lawas. Kinahanglan nga batokan ang atong lawas kay kanunay ug ulipon kini sa katapol ug kaluya. Hangtod nga dili kini mabuntog, mahimo kining makalangan sa atong mga gimbuhaton. Dili nato mabantayan nga gidaug na diay sa lawas ang atong panghunahuna. Ang pagkalangan sa pagbuhat sa angay nga buhaton, ug ang pagbuhat sa dili angay himoon sangpotanan kini sa panagsumpaki sa atong lawas ug hunahuna. Mao diay nga adunay hunghong gikan sa atong tanlag aron ipadayon nga buhaton ang mga laraw ug tumong.
Ang kalig-on sa panghunahuna mag-agad kini sa atong kahanas ug kasinati-an. Ang mga nakat-onan sa tulunghaan, sa trabaho ug sa palibot dako kaayo ug ikatabang sa paghimo ug mga disisyon. Angayan gayud nga magkatukma sa lawas ug hunahuna. Dili tugotan nga mahimong babag ang usag-usa sa mga laraw sa kinabuhi. Dali kaayo natong mabantayan ang mga kausaban sa mga lakang tungod sa hulhog sa atong paminsar. Kon dili lig-on ang atong baroganan alang sa usa ka tumong, mahimong makawang ang maayong katuyu-an Ang dili maayo ug dautan nga mga pangagpas maoy kasagaran nga makababag sa husto ug tukmang mga paghukom.
Talitapos na ang tuig 2022. Nagsingabot na ang bag-ong tuig. Atong nasinati niining tuiga ang daghang mga pagsuway ug hagit sa kinabuhi. Kini naghatag kanato ug kahigayonan nga momugna ug bag-ong mga laraw. Mga laraw nga mahimong sumpay sa mga kapakyasan sa katumanan sa atong mga damgo. Mahimo usab kining tulay alang sa bag-ong mga panglantaw. Samtang ang tawo aduna pay kinabuhi, padayon ang pakigbisog alang sa inadlaw nga panginahanglan. Ang bagyo molurang. Ang dagat mohunong sa iyang pagtaub. Ang mga gumonhap padayon nga moabot sa atong kinabuhi. Atong panghinaut sa usa ka “Malipayong Pasko ug Mauswagon nga Bag-ong Tuig”.
