NANGUNA na ang Talibon sa labing daghang kaso sa dengue dinhi sa Bohol, sa tuig 2022.
Kini human ming-abante ang Talibon hulip sa Tagbilaran City nga maoy nagtungtung sa unang dapit niadtong 2021, kanus-a ang Talibon, wala ngani masulod sa napulo ka lungsod nga may labing daghang kaso sa dengue.
Karon, sa labing daghang kaso nga natala nga 320 ka molupyo nga nasakit ug gidudahang nadengue, ang Talibon nag-una pa sa Tagbilaran City, kinsa maoy may labing daghang kaso niadtong 2021.
Sunod na sa Talibon ang Tagbilaran City karon nga may 256 ka kaso nga natala sukad sa Enero 1 ngadto na sa Nobyembre 20, segun sa talaan nga gipaambit sa Provincial Health Office (PHO).
Ikatulo sa labing daghang kaso sa dengue ang Anda nga may 122 na ka kaso nga natala, bisan pa kon ang nahisgutang lungsod, wala gani nasulod sa 10 ka labingd aghang kaso sa dengue sa mi-aging tuig.
Ika-upat na karon ang Ubay nga may 105 ka kaso se dengue samtang ika lima na karon ang Sagbayan nga may 101.
Sa 2021, ang Sagbayan ika pito sa may labing daghang kaso.
Ika-unom karon ang Clarin nga may 98 ka kaso, samtang niadtong 2021, ikaduha ang Clarin sa may labing daghang dengue.
Anaa sa ikapito nga lugar ang Loon karong tuiga, nga may natala na nga 77 ka kaso samtang ikasiyam ang nahisgutang lungsod niadtong 2021.
Ikawalo ang Inabanga karong tuiga, medyo nimaayo kay sa iyang ikaupat nga pwesto niadtong miaging tuig.
Ikasiyam ang Tubigon karon nga may 72 ka kaso sa dengue, bisan kon ikatulo usab nga dapit ang iyang natala sa may labing daghang sakit sa dengue niadtong 2021.
Ang Dauis na ang ikanapulo karon, sa iyang 69 ka pasyente, gikan sa iyang ika-unom nga lugar sa miaging tuig.
Kini usab samtang ang Bohol karong tuiga, mingtala sa 2,447 ka kaso sa sakit nga dala sa pinaakan sa lamok.
Ang 2,447, ika 987.6% nga pagsaka sa kadaghanon sa dengue nga natala sa Bohol niadtiong 2021 nga anaa lamang sa 225 ka kaso. (RAHC/PIA-7/Bohol)
