DINHI sa kalibotan nga atong gipuy-an, daghang mga butang ang pabiling misteryo sa kadaghanan.
Mga butang nga mahimong mag-aghat kanato nga motugkad gayud sa mga nagpaluyo sa pagkamugna niini. Bisan ang pagkalalang sa tawo nga matud pa gikan sa abog nga gibughan ug kinabuhi, daghan pa ang dili makahatag sa tukma nga pagpasabot sa mga kamatuoran mahitungod niini. Ang pagkahagbong sa tawo ngadto sa kasal-anan usa ka dakong tanghaga nga nagtangag ug daghang mga pangutana. Ang duha ka matang sa kinabuhi nga gihisgotan sa Balaang Kasulatan, espirituhanon ug kalibotanon, nagkinahanglan gihapon ug lawon nga pagpasabot.
Ang mga nakaplagan sa syensya dili pa igo nga makapasabot sa lintonganay. Kasagaran makamugna ug panagbangi sa mga baruganan ug prinsipyo sa matag hunahuna. Unsay hinungdan nga dili managsama ang dagan sa pangutok sa mga tawo? Lisod dawaton ang usa ka kahimtang sa wala makasinati niini. Ang kasinati-an usa ka dakong basihan sa mga nangagi sa atong kinabuhi. Kalipay man ug kasakit, mag-agad niini ang kabug-aton sa inpluwensya sa atong pagkatawo. Dali kitang saysayan sa mga panghitabo nga nasinati sa uban. Dili tanan ang makadawat hangtod nga iya usab kini nga maagi-an. Ang mga sinulat maghulagway lamang sa mga hunahuana sa tawo.
Ang naangkon nga kahanas sa usa ka binuhat namugna human sa kanunay ug balikbalik nga pagsinati niini. Nahimo kining matang sa pagbansaybansay sa inadlaw nga kalihokan. Hangtod nga dili pa hingpit ang nakat-onan ug kahibalo, pabilin nga aduna pay kulang niini. Kulang pa sa kahanas. Ang mga naandan nga gihimo mahimong dili pa makamugna ug kahanas. Sama ra usab nga dili hipno ug hingpit kon dili sibo ug adunay kulang. Tungod kay walay hingpit dinhi sa kalibotan, kulang pa ang mga gihunahuna sa tanan. Maoy hinungdan nga walay tinuod nga kalipay. Ang tinuod nga kalipay anaa sa katumanan sa mga pangandoy sa tawo.
Ang kalibotan nga atong gipuy-an gitawag nga walog sa mga luha tungod kay ang mga namuyo dinhi nangandoy ug tinuod nga kalipay. Ang katumanan sa mga pangindahay momugna ug dugang mga pangandoy, nga bisan pa kon maangkon ang tanan nga gikinahanglan, ang tawo walay katagbawan. Nagpasabot kini nga ang tawo wala gayud makasinati ug tinuod nga kalipay. Luyo sa kamatuoran nga mibati ug kalipay, mahanaw gihapon kini kon matawo na usab ang laing mga pangandoy. Tinuod gayud nga ang tawo walay katagbawan. Hangtud nga siya makaila ug makakat-on ug katagbawan, dili gayud niya masinati ang pagpuyo nga malipayon.
