PANAHON ni Kristo, siya gibaligya ni Hudas sa kantidad nga trenta ka pisitas ngadto sa labawng kapari-an aron siya dakpon. Ang kalibotan nga atong gipuy-an usa ka dagway sa kuropsyon. Usa kini ka dili maayong binuhatan ug supak sa maayong pamatasan. Sa Pilipinas, adunay daghang mga balaud nga naghisgot mahitungod niini, unsaon pagpakgang sa pangurakot, unsaon nga mapugngan kini. Apan gani, bisan pa sa nanglabayng mga siglo wala man gayud kini masumpo. Dili lamang kini gihimo sa mga anaa sa poder. Mismong ang mga katawhan, yanong mga lungsoranon, maoy nagtukmod ug nagtudlo sa mga kurakot ug dili kurakot nga mangurakot.
Daghang mga higayon nga nahitabo ug nasinati ang kuropsyon ug pangurakot. Sukad pa kini sa pagkadagma sa atong unang ginikanan nga mabasa sa Balaang Kasulatan. Tungod kay kinaiya kini nga tawhanon ug dala sa panginahanglan. Gani maoy hinungdan nga sa panahon ni Moses, namugna ang Napulo ka Sugo tungod sa hiwi nga mga binuhatan sa mga katawhan. Ang pangurakot kasagaran gihimo sa mga anaa sa poder ug gahum, sa pagdumala sa kagamhanan, sa mga patigayon, sa mga kapunongan ug gani sa kaugalingong pamuyo. Adunay daghang nanaway sa mga pangurakot apan daghan usab ang moingon nga dili na kini ikatingala.
Mao na kini ang nasandan. Gigamit kini nga sakyanan sa mga isyo panahon sa pinili-ay, pagsabotahi ug pagsurambaw sa mga nangatungdanan ug pagguba sa pagsalig sa mga katawhan sa namuno-an. Sa mga patigayon ug negosyo, nahitabo usab kini tungod kay adunay gitawag ug panag-ilogay ug bukog (power struggle). Nauso ang mga suborno, padangog, panipsip ug uban pa nga himoon aron lamang nga mapadali ug matuman ang mga katuyu-an. Kini maoy gipahimuslan sa naghupot ug mga posisyon sa kagamhanan.
Bisan sa mga panimalay, adunay gitawag nga palakasan ngadto sa mga nanay ug tatay. Gitudlo usab ngadto sa mga kabataan nga modawat ug pahalipay.
Matag administrasyon mosaad nga sumpuon ang pangurakot. Daghan na ang nanglabay apan hangtud karon pabilin gihapon kini nga sakit sa kagamhanan ug mga katawhan.
Daghan nang mga balaud ang napanday ug gipatuman apan wala pa gihapon mahanaw ang kuropsyon. Kulang pa siguro ang pagpasabot ug pagtudlo sa mga katawhan kon unsa gayud ang kurakot ug unsay buhaton. Human sa dugang pagtudlo ug pagpasabot, tukoron ang usa ka mugna(movement) nga molambigit sa mga katawhan aron makigbatok sa pangurakot. Usa ka mugna nga tinud-anay ug dili pagpaka-arong-ingnon. Hangtod nga aduna kini nga mugna, wala gayoy kasulbaran ang pangurakot.
