GIPAHIMANGNOAN sa Bohol Police Prov’l. Office (BPPO) ang publiko batok sa gitawag nga “love scam” nga gihimo pinaagi sa mga platform sa social media.
Nipagawas ang Kampo Dagohoy sa pahimangno nunot sa pagkasikop sa duha ka mga Nigerian nga giingong nalambigit sa maong matang sa pangilad didto sa kauluhan.
Ang mga suspek nga sila si Felix Aondowase ug Emmanuel Abia, giakusahan nga nangilkil og liboan ka kuwarta gikan sa usa ka negosyante.
Giingong nagpakaaron-ingnon sila nga mga Australian national aron ilang madani ang babaye, kinsa nipadala og pribadong mga litrato.
Sumala pa sa BPPO nga niining panahon sa ‘digital age’ dali nalang kaayu ang paghimo sa binuang hinungdan nga angay magmatngon ang tanan.
PAGPANALIPOD SA KABATAAN
GIKLARO sa kapulisan sa Bohol nga di lang sila kutob sa paggukod sa mga kriminal, apan pagtabang usab sa publiko ilabi na mga bata nga malikay gikan sa dautang elemento.
Mao kini ang pamahayag sa kapulisan sa lalawigan bahin sa ilang gihingusgan nga programa alang sa kabataan atol ning pagsaulog sa National Children’s Month.
Sumala sa BPPO nga muhimo sila sa ‘infomration education campaign’ lakip na ang gift-giving sa mga kabus nga kabataan atol unya sa kapaskuhan.
Nakita sa kapulisan nga ang kabatan-unan ang dali karon nga mabiktima sa nagkadaiyang krimen ug magamit aron mamiktima ilabi na ang mga libud-suroy nga kabataan nga ang pipila kanila ang nalambigit na sa prostitusyon.
Dugang sa BPPO nga gidobli nila karon ang ilang ‘awareness campaign’ ngadto sa mga kabataan sa lalawigan lakip na usab ang may kalambigitan sa pagproteher sa kababayen-an. (RTB)
