TAGBILARAN CITY, Bohol, Nov 3 (PIA) –Namenosan man og dyutay ang kadaghanon sa mga nasakpan sa mga tinugyanan sa kagamhanan ilabi na sa paghingusog sa kampanya batok sa illegal nga sugal, mingsapong pa gihapon sa P156,775.00 ang kantidad nga nasakmit nga pusta niining mga operasyona.
Kini maoy gipaambit ni Police Major Norman Nuez, ang Deputy for Operations sa Kampo Dagohoy atul sa gipahigayun nga tigum sa Provincial Peace and Order Council (PPOC) sa milabay nga semana.
Matud ni Major Nuez, gikan sa Enero ngadto sa Oktubre 25, ming-abut sa 369 ka mga anti-illegal gambling operations ang napahigayon sa mga kapolisan sa tibuok Bohol.
Niini, mikabat sa 1,413 ka mga sugarol ang nasikop, diha nga kalit nga minghugpa ang kapolisan sa ilang illegal nga mga pasugal.
Dugan ni Major Nuez nga ilang gihatagan og prayoridad ang illegal nga sugal sama sa tigbakay, baraha o tong-its, piyat-piyat ug ubang sugal nga migamit sa baraha, hantak, masiao o swertres, illegal nga mahjong ug uban pang matang sa sugal pusta-anay, nga nakapagabok sa sapot sa katilingban.
Segun sa taho sa Kampo Dagohoy, labing daghang operations sa kapolisan ang napunting sa illegal nga sugal gamit ang baraha, human ang mga tinugyanan mingtugot na nga buksan og balik ang mga buwangan.
Mingkabat sa 161 ka operations ang gihimo sa kapolisan sa Bohol batok niining matang sa sugal.
Human gikadeklara ang Bohol nga anaa na sa Level 3 batok sa COVID, gitugot na usab ang pabuwang, nga maoy mipamenos sa mga tigbakay.
Apan bisan pa, ming-abut pa gihapon sa 104 ang operations sa kapolisan batok sa illegal nga pasabong.
Sa mahjong, 49 ka operations ang napahigayon samtang 17 ang lihok sa kapolisan batok sa swertres.
May 11ka higayon usabnga ang kapolisan mingsakdap sa nanggihantak samtang may lain pa nga 27 ka sitwasyon sa illegal nga sugal nga gigukod sa mga kapolisan.
Niining tanan nga mga operations, ang P156 mil nga pusta pa lamang nga nasakmit, daku na kini nga timailhan nga may hulga na usab sa kita nga alang na unta sa kaayohan sa banay ang nahanaw, kay wala kuyogi sa maayong palad. (rahc/PIA-7/Bohol)
