ANG GIILA nga ‘greatest Boholano’ kon ‘Bohol’s Most Illustrious Son’ kanhi Pres. Carlos Polistico Garcia usa ka inspirasyon sa mga lideres sa Bohol kansang pag-alagad sa mga katawhan wala mamansahi sa bisan unsa mang bahid sa kurapsyon.
Kini ang gipadayag sa ikaduhang labing-labaw nga opisyal sa Bohol atol sa ika-126 ka tuig nga birthday ni kanhi presidente CPG kaniadtong Nobiyembre 4, 2022.
Sumala pa ni Bise-gobernador Dionisio Victor Balite, Ph.D nga ang mga panglantaw ug kaalam sa kanhi pamuno-nasud nga natawo sa lungsod sa Talibon, ang nagpadayon nga buhi ug padayong nag-inspire sa dili hitupngan nga kalampusan sa Bohol karon.
Si VG Balite miila sa “Filipino First” policy ni CPG nga maoy nagbungkag sa ‘’colonial mentality” sa mga Pinoy kaniadto.
Dugang pahinummdom sa bise-gobernador nga miaksiyon gilayon sa ‘Bohlen Serrano Agreement’ nga nagpaus-os sa pagrenta sa
US bases gikan sa 99-anyos ngadto sa 25-ka tuig ug e-renew matag lima ka tuig ug siya ang nangamahan sa sayo nga ‘Independent Foreign Policy’ sa Pilipinas.
Gihulagway usab ni Balite nga si Garcia nahimong modelo usab sa pagpuyo nga simple ug walay bahid sa kinabuhi ug nga hilabihan ka matinud-anon, dunay integridad ug kredibilidad sa pagdala sa kagamhanan.
Subay niini, non-working holiday sa tibook Bohol kaniadtong Huwebes, Nobyembre 4, 2022 pinasubay sa Akta Republika 7448. (RTB)
