HANGTOD nga ang matag usa kanato adunay kalinaw sa kaugalingon, dili kita makapaabot nga mapatunhay ang kalinaw sa kalibotan. Hangtod nga dili kita makasabot sa atong kaulingong hunahuna, dili nato masabtan ang uban. Ang matag tawo adunay kaugalingon nga panghunahuna. Ang imong hunahuna dili mahisama kanunay sa panghunahuna sa uban. Maoy hinugdan nga adunay dili kanunay nga pagsinabtananay. Kon usahay dili kita makasabot sa atong kaugalingon, unsaon nato pagsabot sa uban?
Kon ang duha, tulo ka mga tawo dili magkasinabot, unsaon pagkasinabot sa usa ka pamilya? Ang katilingban, ang kalibotan?
Kon maghisgot ug pagsabot sa kaugalingon, unsay buot ipasabot? Daghan ang angay sabton sa atong kaugalingon. Sabton nato ang panglawas, emosyon, mga damgo ug panglantaw. Kon dili kita makasabot bisan pipila pa lamang ka bahin sa atong pagkatawo, unsaon kaha pagsabot sa kinatibuk-an sa tawo? Unsaon nato pagsabot sa kinatibuk-ang katilingban sa kalibotan? Kon walay pagsinabtanay, aduna bay kahusay ug kalinaw? Kon kini maoy mohari sa tibuok kalibotan, mapatunhay ba kaha ang kalinaw? Unsay buhaton aron maangkon kini? Ang matag usa kanato moduwa gayud sa atong papel aron magmalamposon ang drama sa kalinaw.
Ang atong henerasyon karon kabilin lamang sa nanglabay nga kaliwatan. Kon unsa sila kaniadto, tipik lamang kita sa ilang kinatibuk-an. Kon sa panahon ni Cain ug Abil, diha nay walay pagsinabtanay, nagpasabot lamang nga bisan sa ilang panahon, wala nay kalinaw. Angay natong masayran nga usa pa lamang ka pamilya ang nagpuyo niadtong panahona. Kon sa ilang panahon, wala nila mapatunhay ang kalinaw, unsa naman kaha karon? Unsa man kaha ang hinungdan, ug mga hinungdan? Giunsa man kaha nila pagdala ang ilang tagsatagsa ka kaugalingon? Anaa ba kaha sa pagdala sa tagsatagsa ka kaugalingon ang katunhayan sa kalinaw.
Daghan ang moingon nga lisod pagdumala ug mga tawo. Dili tanan ang mahibawo modala sa kaugalingon. Tungod sa dili maayong pagdumala nahitabo ang kasamok. Dautan ba ang kasamok? Apan daghan ang gusto ug kasamok kay mao kini ang ilang kinabuhi. Daghan ang mihimo niini nga panginabuhi-an. Ang pagmugna sa bombang nuklyar wala gitumong aron makahunos ug daghang kinabuhi. Bisan kon mao kaha gayud kini ang katuyuan, gisugyot usab nga gamiton kini aron pagpatunhay sa kalinaw. Gihimo kining pagtulun-an tungod sa nasinati ug kasinati-an. Diha kahay walay gusto nga mangamatay ang mga nabiktima niini?
