NIGAHIN ang National Housing Authority (NHA) og P797,535,000.00 alang sa 2nd tranche sa Emergency Housing Assistance Program (EHAP).
Alang kini sa mga nabiktima sa Bag-yong Odette nga wala pa nakadawat sa hinabang sukad ang maong kalamidad.
Target kini nga ma-implementar sa Nobyembre 2022 ngadto na sa Pebrero sunod tuig.
Kahinumduman nga daghang mga Bol-anon ang nagbagutbot gumikan kay daghan pang mga kalabalayan ang wala pa napatarung gumikan sa kanihit sa pundo.
Sa dihang niari si DSWD Sec. Erwin Tulfo sa Bohol, namahayag siya nga alang na lamang sa AICS ug Educational Assistance ang ilang pundo apan maningkamot siya nga matuki sa budget deliberations didto sa Ubos Balay Balauranan ang pagtabang sa mga nabiktima sa Bagyong Odette.
Dinhi nadasig ang Kagamhanang Probinsyal pinangulohan ni Gob. Aris Aumentado arun sa pagpangita sa pundo nga mahimong itabang sa mga Bol-anon. (Kahlil Lester O. Camba)
