Dul-an sa tunga sa milyon ka pesos ang kabtangan sa kagamhanan nga iyang itugyan ngadto sa mga mag-uuma sa humay, apan kon kwentahon ang possible nga tabang niini sa seguridad sa pagkaon sa Bohol, mahimong ang bili niini, ania ra sa kumingking.
Kini human mipadayag ang lima ka mga kahugpungan sa mga manghuhumay sa Bohol nga mangayo sa Probinsya sa Bohol og mga gamit alang sa ilang pangpanghumay nga makatabangs a pagpadaghan sa abut sa pagkaon dinhi.
Matud pa ni Sangguniang Panlalawigan Committee on Government Properties and Enterprises Committee Chair Board Member Greg Crispinito Jala, mipadayag na sa ilang katuyuan nga mangayo og hinabang alang s gamit sa panguma ang lima ka mga kahugpungan nga nanghumayan, ug gani, mipadala na usab kini sa listahan sa ilang mga opisyales, mao nga ang pagtugot na lamang sa Bohol pinaagi sa resolusyon sa SP nga natugot niini mao na lay gihuwat aron matugyan na ang tulo ka units nga eccentric rice thresher (bulhot), 2 ka units nga turtle power tiller ug laing duha ka units nga hand tractor.
Segun pa ni Assistant Provincial Agriculturist (OPA) Larry Pamugas, niadto pang Disyembre 11, 2014 mapalit sa Bohol ubos sa Purchase Order No. 1101 gikan sa iyang Capital Outlay, nga ipanghatag usab sa mga mag-uuma.
Sa joint meeting nga nagtuki sa hangyo sa OPA nga giendorso usab ni Gobernador Erico Aristotle Aumentado ngadto sa SP, si Committee Chairperson sa Agrikultura nag si Bise Gobernador Dionisio Victor Balite mingbati sa ka mahinungdanon sa ikatampo sa produksyon sa humay niining mga himan nga mopapaspas sa pag-daro ngadto na sa paggi-ok sa humay nga menos na ang usik.
Plano sa Bohol nga ihatag ang usa ka accentric rice thresher o bulhot ngadto sa Magtalisik Irrigators Association pinaagi ni Anaceto G. Panaderos sa Kagawasan, San Miguel, laing nga bulhot ngadto sa Dadagan Irrigators Association sa Kagawasan San Miguel gihapon pinaagi ni Isabelo Palma ang president ug laing bulhot nagdto sa Lomangog Ubay Farmers’s Association pinaagi ni Glicerio Nuez.
Ang Lomangog FA, nangayo na usab og usa ka turtle power tiller ug laing hand tractor.
Sa laing bahin, mahimo usab nga makadawat og libre nga turtle power tiller ang Katorawo Farmers Association sa Linawan, Anda pinaagi sa presidente niini nga si Genovevo O. Olalo, samtang ang Magtalisik Irrigators Association sa Kagawasan, San Miguel, Bohol pinaagi sa presidente nga si Panaderos nangayo na usab og hand tractor.
Sa pagpamalit niining nahisgutang ekipos, migasto ang Bohol og P64 mil sa eccentric rice thresher, P55 mil sa turtle power tiller ug P58,500 sa hand tractor, segun sa taho sa joint committee nga nagtigum alang sa paghatag og resolusyon alang niini.
Kon ikapagawas na sa SP ang resolusyon nga mao na lamang ang bugtong kakuwangan aron ikatugyan ang himan, igo na usab kini nga magamit sa mga kahugpungan sa sunod nga tingtanum. (rahc/PIA_7/Bohol)
