SA dili madugay, magsugod na ang production line sa City Garments Manufacturing Cooperative nga giapilan sa mga kababaehan nga sakop sa mga kahugpungan sa mga kababayen-an sa Tagbilaran.
Kini human matapos ang ikaduha nga hugna sa mga bansaybansay alang sa pagpanahi ug pagpangsastre nga gipasiugdahan usabs a syudad kauban ang Technical Education and Skills Development Authority.
Matud ni Adelfa Salutan, hepe ug coordinator sa City Livelihood and Community Development Unit (CLCDU) ubos sa buhatan ni City Mayor Jane Yap, sa miaging administrasyon pa ni John Geesnell Yap napalit sa syudad ang mga makina sa pagpanahi, samtang nag-organisa pa usab sa mga bansaybansay.
Ubos sa saad nga doblehon pa sa asawa sa kanhi mayor ang suporta sa kababayen-an sa syudad, nahukman sa bag-ong administrasyon nga tinud-on na ang pagpanahi agi og dugang kapanginabuhi-an sa mga kababayen-an sa syudad, ilabi na kadtong anaa lamang sa balay ug walay trabaho.
“Ang City Government of Tagbilaran nag-implementar niining programa nga Bangon ug Abante sa Bag-ong Asenso Livelihood diin ang pulos mga kababayen-an nga gisurvey, ang ilang interes anaa sa pagpanahi,” butyag ni Salutan sa usa ka interview.
“Sa ilang napili nga skills training sa dressmaking and tailoring, didto pod nakuha ang konsepto diin ang mga taga Tagbilaran na lang ang motahi sa mga uniporme sa programa nga libreng uniporme sa mga public schools dinhi,” sumpay niya.
Kahinumduman nga si former city mayor John Geesnell Yap nagpatuman sa libreng uniporme sa mga taga Tagbilaran City nga nagtunghan sa mga pangpubliko nga tunghaan gikan sa kindergarten paingon sa elementraya.
Kaniadto, adto ang syudad magpatahi sa ilang mga libre’ng uniporme sa Cebu, ug kasagaran nga resulta, dili sibo sa sukod ug usahay malangan sa delivery, mulo sa coordinator sa City Livelihood programs.
“Gikan sa 50 ka ming-apil sa bansaybansay, dili man ang tanan mokuyog sa manufacturing nga may direksyon sa atuang center program, ug karon, halos dili na nila maapas ang ilang mga tahi-onon,” matud ni Salutan.
Karon, ang mga mingtapos sa dressmaking ug tailoring training, mao nay nagtahi sa mga uniporme sa mga buhatan sa syudad, ug may mga separate usab nga orders alang sa customized unifprms sa pipila ka mga buhatan sa syudad.
Matud ni Crispina delos Reyes, sakop sa hugpong sa kababayen-an sa Manga, nalipay siya nga naapil sa proyekto kay napun-an ang iyang kita sa pagpanahi.
May kaugalingon man nga pagpanahi si delos Reyes, sa pagsulod niya sa garments manufacturing sa syudad niadtong panahon sa pandemic, mas midaghan ang iyang kita kay ang mga gamit sa syudad de koryente, sahi sa iyang makina igtatahi nga manual.
“Bintaha na man gud anhi kay paspas ang trabaho kay puro de koryente man gud ang tanan, sa balay baya kay sikadsikad ra ang akong makina mao nga nagpasalamat ko nga medyo ni-uswag ang akong kita,” saysay ni delos Reyes samtang nagtahi sa tulo ka uniporme sa us aka pribadong tunghaan sa high school sa Tagbilaran.
“Karon, makaingon na ko nga nagmalampuson ang programa bisan kon wala pa kita makakompleto sa manufacturing business kay wala pa man kita makalusad, apan sa ilang pagpanawat na sa mga orders sa mga eskwelahan, daku na kini og ikatabang,” panapos ni Salutan. (RAHC/PIA7 Bohol)
