SAMTANG ang kalibotan gisungog sa pandemiya tungod sa Covid 19, gihulga usab ang kahimtang sa kahusay ug kalinaw niini. Niadtong Pebrero 24 niining tuiga gilusob sa Russian Federation ang Ukraine. Kini nagpakaylap ang Russo-Ukranian War nga nagsugod na niadtong Pebrero, 2014. Sa wala pa ang nahitabong paglusob, nabantayan nga gipalig-on ang militar sa Russia palibot sa Ukraine apil na sa silingan nga nasud sa Belarus. Giakusahan sa North Atlantic Treaty Organizaton (NATO) ang Russia nga nangandam sa paglusob sa kinatibuk-ang Ukraine ug kini gipanghimakak sa kagamhanan sa Russia. Gusto usab sa Russia nga did-an ang Ukraine nga moapil sa North Atlantic Treaty Organization (NATO).
Ang gubat sa Russia ug Ukraine misangpot sa mga sanctions gikan sa Amerika ug mga nasud sa Europe ngadto sa Russia nga gitumong aron luyahon ang ekonomiya niini. Naapektohan ang supply sa gas didto sa Europe nga nakapadugang sa nasinati nga krisis-ekonomikanhon. Ang maong gubat nakapaundang sa naandan nga supply sa mais ug trigo gikan sa Ukraine nga maoy nakaingon sa pagtaas sa presyo sa mga pagkaon sa katawhan ug kahayopan. Misangpot kini sa pagsaka sa presyo sa nag-unang mga palaliton sa tibuok kalibotan. Kon padayon kining maong kahimtang, gikahadlokan nga mokaylap ang panagbangi paingon sa ikatulong gubat sa kalibotan.
Wala usab malilong nga ang North Korea mipahigayon sa pagsuway sa ilang mga missiles, milusad ug mipalupad niini didto sa kadagatan sa Japan. Ang pagduaw ni Speaker Nancy Pelosi sa Taiwan niadtong miaging Agosto niining tuiga nakapaalsa ug pagpakabana sa China. Niining nahisgotang mga kalamboan, napahigayon ang mga joint military drills sa mga kadagatan sa Taiwan, Japan ug Korea. Ang kagamhanan niining mga nasora mihimog mga lakang ug pagpangandam nunot sa mga kalihokan ug panghitabo. Ang Tinipong Bansa sa Amerika nakiglambigit usab sa iyang mga kaalyados. Ang Washington ug Beijing, gani ang Pyongyang ug Seoul, init usab nga nagbayloay ug hait ng mga pulong. Gikataho nga adunay mga nasud sa kalibotan nga naghupot ug mga armas-nuklyar. Gikahadlokan nga sila molambigit ug makig-uban sa nag-unang mga nasud kon adunay mahitabong gubat. Ang Estados Unidos wala moapil sa gubat sa Russia ug Ukraine. Ang China mihulga nga kuhaon ug ipa-ilawom sa pagkontrolar ang Taiwan nga giingong apil sa teritoryo sa ilang nasud. Ang lihok sa Saudi Arabia gipanid-an usab tungod kay kini maoy nanguna sa OPEC+. Ang mga nasud nga sakop sa OPEC+ nagkahiusa sa pagpakunhod ug dos milyones barilis matag adlaw sa ilang produksyon. Kini nga lakang gilantaw nga makapasaka sa presyo sa mga produktong petrolyo sa umaabot buwan sa Nobyembre.
