GIKOMPERMAR ni Gobernador Aris Aumentado karong bag-o ang paglungtad sa usa ka “cartel” nga maoy nagkontrolar sa presyo sa isda sa tibook probinsiya.
Niingon si Aumentado nga ilang gipadali ang pagdala sa nagkadaiyang klase sa isda gikan sa Zamboanga paingon dinhi sa miaging semana ug gibaligya kini sa mas ubos nga presyo.
Matod niya nga nagpamatuod kini sa paglungtad sa gitawag nga fish cartel.
“Gapakurat mi og sud og isda diri sa Bohol, unsay nahitabo, from P260 to P280 ang presyo, paghibaw nila nga mo baligya mi og P180, nikanog sila og P160. Pag abot og P160, among gisuwayan P160, nikanog og P140, pasabot naa gyuy cartel dinhi,” matod ni Aumentado.
Matod ni Aumentado, padayon silang mangitag isda gikan sa ubang probinsya ug ibaligya kini sa mas ubos nga presyo.
Apan siya nasubo nga ang ilang mga paningkamot gitubag gihapon sa mga pagsaway, nga nag-ingon nga adunay mga kahimtang nga hinungdan sa mga presyo sa isda ug dili na makontrol sa gobyerno.
Ang unang termino nga gobernador niingon nga dili mahimo nga ubos ang presyo sa isda sa tanang panahon.
Matod ni Aumentado, aduna silay lain pang mga programa nga gituyo aron makatabang sa pagsulbad sa perennial nga problema sa mga mahalon nga isda dinhi.
Matod niya nga plano usab nila nga ipatuman ang “buy-back” system diin ang gobyerno mopalit diretso sa mga mananagat ug itugyan kini ngadto sa mga kooperatiba nga maoy mobaligya sa mga konsumidor. (RTB)
