GITANYAG ni Gobernador Aris Aumentado ang Governor’s Mansion sa mga ahensya sa nasudnong kagamhanan nga aduna na untay mga sanga sa probinsiya sa tinguha nga mahatagan og kasayon ang mga Bol-anon pinaagi sa pagwagtang sa panginahanglan nga mobiyahe sa Sugbo o Manila alang sa mga transaksiyon sa gobyerno.
Matod ni Aumentado, ang Gobernador’s Mansion subay sa main thoroughfare sa Tagbilaran City CPG Avenue himoong national agency hub aron mahatagan og kasayon ang mga buhatan sa gobyerno nga nagplano sa pagpalapad sa ilang coverage sa probinsiya.
Partikular nga gipaabot ni Aumentado ang imbitasyon sa Land Transportation Franchising and Regulatory Board (LTFFRB), Department of Foreign Affairs (DFA) ug Overseas Workers Welfare Administration (OWWA), nga ang tanan dugay nang gihangyo sa publiko.
Gitataw ni Aumentado nga ang kakuwang sa luna sa opisina maoy nag-unang gikabalak-an sa mga ahensya sa gobyerno nga nagtinguha sa pag-abli og mga sanga sa Bohol.
Nasayran ning pamantalaan nga nadawat na ang tanyag ug gikonsiderar na sa mga hingtungdan nga ahensya sa gobyerno.
Sa pagkakaron, ang mga residente sa Bohol kinahanglang mobiyahe sa Cebu o Manila alang sa mga transaksyon sa OWWA, DFA ug LTFRB.
Ang publiko ilabina ang liboan ka mga overseas Filipino workers sa probinsiya dugay nang nagpataas sa panginahanglan sa mga lokal nga buhatan sa OWWA ug DFA. (RTB)
