GILAUMAN ang pagtukod og mga bag-ong lawak-klasehanan ug rehabilitasyon sa mga pasilidad sa eskwelahan nga naigo sa bagyo sa Bohol nga magsugod sa Nobyembre sigon sa Department of Education (DepEd).
Matod ni Danilo Gudelusao, hepe sa DepEd’s School Governance and Operations Division sa Bohol nga mangingkamot sila nga masugdan na og trabaho sunod buwan.
Sigon sa opisyal nga anaa na sila sa “post-qualification” stage human gi-bid sa gobyerno ang construction projects ngadto sa 26 ka mga kontraktor niadtong Septiyembre.
Ang mga midaog nga bidder naglakip sa mga kompaniya gikan sa Bohol, Samar, Leyte, Zamboanga, Isabela ug ubang bahin sa Luzon.
Matud ni Gudelusao nga ang nasudnong kagamhanan nigahin og P228 milyones alang sa construction works pinaagi sa quick response fund sa DepEd.
Bisan pa, ang badyet dili maigo sa gikinahanglan nga kantidad alang sa rehabilitasyon sa tanan nga mga eskuylahan nga nadaot sa Bagyong “Odette.”
Samtang matud pa usab ni Domingo Lamoste, hepe sa DepEd Physical Facilities and Schools Engineering Division, ang departamento nanginahanglan og P2 bilyones aron maayo ang tanang classrooms sa mga pampublikong tunghaan sa probinsiya nga naguba sa bagyo.
Matud niini nga ang pondo alang sa rehabilitasyon ug pagtukod sa classroom wala maapil sa 2022 budget sukad nga niigo ang bagyo sa probinsiya niadtong Disyembre 16 sa miaging tuig.
Ang General Appropriations Act of 2022 gipasa sa Kongreso sa sayong bahin sa Disyembre.
Base sa naunang datos nga gihatag sa DepEd, ang kasamtangang magamit nga pundo mosakop lang sa 32 ka mga tunghaan.
Mokabat sa 398 ka mga tunghaan ang naapektuhan sa Bagyong Odette nga mikusokuso sa Bohol niadtong Disyembre 2020 ug miguba sa nagkadaiyang mga imprastraktura ug residential properties sa isla.
Dugang ni Gudelusao nga pipila ka mga tunghaan nga nakaangkon lang og ginagmay nga danyos migamit sa ilang School Maintenance and Other Operating Expenses budget alang sa pagpaayo. (RTB)
