SUNUGON na ang mga shabu nga narekober sa Bohol ug gibanabanang mokabat sa P7.3 milyones sunod buwan pinaagi sa pagsunog niini sa Sugbo uban sa ubang nasakmit nga ilegal nga drugas sa rehiyon.
Si Philippine Drug Enforcement Agency (PDEA) Bohol information officer Leia Alcantara niingon nga ang ilegal nga drugas nga motimbang og 1,071 grams ang gi-turnover ngadto kanila sa Bohol Police Provincial Forensic Unit sa miaging semana.
Matod ni Alcantara, ang illegal-drug haul usa ka aggregate sa shabu nga nakolekta sa kapulisan gikan sa 2,000 hangtod 2021.
Kini ang mga droga nga wala’y kalabotan sa bisan unsang mga kaso nga gisang-at sa korte.
Gi-turnover usab sa PDEA ang 788 gramos nga dahon sa marijuana nga gibana-banang mobalor og P94,662.
Niadtong 2021, ang PDEA nakaguba og P25 milyones nga kantidad sa shabu nga nasakmit sa Bohol.
Ang ilegal nga drugas gidala sa Cebu City gikan sa Bohol ug gisunog sa crematorium.
Ang upat ka kilo nga shabu nasakmit gikan sa dili mominos 30 ka mga tawo nga nasikop sa Bohol gikan niadtong 2015 hangtod 2018 ug kansang mga kaso nasulbad na. (AD)
