GIHIMOAN sa pagsubo sa Tagbilaran City local government unit (LGU) karong bag-o ang yuta alang sa tenement “twin towers” nga puy-anan sa 80 ka mga pamilyang kabus sa siyudad ug maoy unang bertikal nga proyekto sa pabahay sa gobyerno sa siyudad.
Gipangunahan ni Mayor Jane Yap ang groundbreaking ceremony sa upat ka andana nga pasilidad nga itukod duol sa wala na gamita nga dumpsite sa dakbayan sa Barangay Dampas.
“This is a vertical housing composed of five to four stories and around 40 families per building kay duha ka buok ang atong itukod diri sa Tagbilaran,” matod ni Yap.
Samtang matod pa usab ni City Engineer Teodoro Estoque nga ang siyudad nigahin og pasiunang P33 milyones alang sa maong proyekto.
Ang pasilidad tukoron sa 600-square meter nga lote nga gipanag-iya sa LGU diin ang matag building adunay upat ka andana nga adunay walo ka unit matag usa.
Matod ni Estoque nga sa dili madugay ilang i-bid out ang katukoran sa proyekto nga dumalahon sa City Engineering Office.
Samtang, padayon pa nga gi-finalize sa siyudad ang listahan sa mga benepisyaryo sa maong proyekto.
Sa sayo pa, si Yap mipirma og memorandum of agreement uban sa Department of Human Settlements and Urban Development (DHSUD) alang sa “Pambansang Pabahay para sa Pilipino: Zero Informal Settlers Families Program for 2028.”
Ang ahensya, pinaagi sa inisyatiba, molugway og binuwan nga subsidy nga P1,500\ alang sa matag benepisyaryo nga pamilya alang sa ilang amortisasyon. (RTB)
