GILADLAD ni Corella Mayor Juan Manuel “Manju” Lim ang iyang mga accomplishments sulod sa unang 100 ka adlaw sa panerbisyo isip amahan sa lungsod.
Atol sa pakighinabi sa media, gibutyag niya nga nindot nga social services ang ilang prayoridad sa Corella bisan pa man nga 5th class income municipality kini.
Gipasakahan ang Cash gift sa mga Senior Citizens gikan sa P500 ngadto sa P1,000 lakip na ang Birthday Cake gikan sa kaugalingong panudlanan sa mayor.
Dugang pa niini ang pag-implementar sa Bereavement Assistance nga P2,500 alang sa nagbangutang pamilya apil na ang 1 ka sakong bugas.
Ang ilang mga Job Order (JO) casual nagdawat kaniadto sa P270/adlaw apan sa pag-asumir ni Lim pagka mayor gipasakahan kini ngadto sa P300/adlaw. Karong tuiga, mao gihapon ang madawat sa mga JO apan gipagamyan ang kadaghanon nila.
Giumol usab ang mga buhatan/position alang sa mas paspas nga operasyon sa Balay Lungsod. Kini naglakip sa Tourism Officer, General Services Office, Solid Waste Management Office, Information Office, Chief of Staff sulod sa Buhatan sa Mayor ug Office of Municipal Administrator.
Wala hingkalimti sa mayor ang pagpanindot sa mga kalsada sa lungsod ug nakig-alayon sa Probinsyal nga kagamhanang Probinsyal. Ang Provincial Government ang niabaga sa heavy equipment lakip na ang manpower samtang ang LGU ang sa krudo ug “road improvement” materials sama sa anapog.
Kahinumduman nga si Mayor Lim ang nipilde kang kanhi mayor Dee Tocmo sa 2022 piniliay samtang mayorya sa Sangguniang Bayan nga gipangulohan ni Bise Mayor Danny Bandala ang kaalyado sa mayor.
Ang Corella ang gibansagang “The Municipality that Never Sleeps” sanglit paspas man ang dagan sa kalambuan. (Kahlil Lester O. Camba)
