MILAUM ang Bureau of Fisheries and Aquatic Resources (BFAR) sa Bohol nga makatabang ang pagpahibalik sa pagpangrehistro sa mga commercial fishing vessels aron mapun-an ang kakuwang sa isda nga makita sa mga merkado.
Didto sa milabay nga Kapihan sa PIA, mibutyag ang BFAR Bohol pinaagi ni Provincial Fisheries Officer Candido Samijon nga mingsamot kadaku ang panginahanglanon sa isda sa Bohol tungod sa pagkaguba sa mga punong ug mga fish cages niadtong naagi-an sa bagyong Odette.
Nagsugod lamang og pagpahiuli sa mga nangagubang imprastraktura ang BFAR niadtong pipila ka buwan human ilang nadawat ang partial nga pundo aron ikapahiuli og balik ang pagpadagan sa mga hatcheries ug pasilidad sa semilya sa isda aron lamang may makuha na nga mga fingerlings.
Apan kini, matud ni Samijon, moabut pag lima ngadto sa unom ka buwan usa pa modagko ang semilya nga igo na nga maharvest.
Sa natad sa commercial fisheries, menos na usab ang makapanagat kay pipila lang usab ka panagatan ang nakalingkawas sa Odette.
Kahinumduman usab nga sugod niadtong Enero 24, 2019, nagpagawas ang BFAR og moratorium sa pagpanghatag sa mga bag-o nga Commercial Fishing Vessel Gear License (CFVGL).
Sukad niadto, wala nay lisensya pa sa commercial nga panagatan nga gipagawas, subay usab sa BFAR Administrative Circular No. 253-1 series of 2018.
Apan niadtong Enero 23, 2022 o human sa tulo ka tuig nga moratorium, gibalik na sa BFAR ang pagpanawat sa mga applications sa CFVGL, subay na usab sa Fisheries Administrative Order No 198-1 series of 2018 o ang Rules and Regulations governing the registration and licensing of commercial fishing vessels , fishing gears and fish workers.
Segun sa BFAR, ang mga aplikante mahimo na nga mofile sa ilang application pataban ang kompleto nga rekisitos ngadto sa BFAR Regional Office nga dunay hurisdiksyon sa homeport sa nahisgutang fishing vessel.
Mipahinumdom usab ag BFAR nga kadto lamang nga aplikasyon nga may kompeto nga rekisitos ang dawaton sa mga BFAR Regional Offices. (RAHC/PIA7 Bohol)
