GIPADAYAG sa labing unang babayeng magbabalaod sa Segundo distrito CongW. Vanessa ‘Vanvan’ Aumentado nga ang ubos balay-balauranan nihimo na sa pag-recess sa ilang trabaho sugod niadtong Biyernes, Septyembre 29, 2022.
Sigon ni CongW. Vanvan nga dungan sa pag-recess sa session mipasar na alang sa ikatulo ug katapusang pagbasa sa Kamara-Baha ang House Bill No. 4488 kon General Appropriations Bill alang sa Fiscal Year 2023.
Dugang sa babayeng kongresista nga dakong niyang garbo nga tipik siya ug kabahin alang sa approval sa maong House Bill.
“Isip inyong bag-ong Kongresista sa Segundo Distrito, kanunay natong gi consider og unsay mga kaayohan nga atong mahatag para sa mga katawhan. Laumi nga serbisyong TATAK AUMENTADO akong ipabilin,” sumala pa ni CongW. Vanvan.
Gibutyag pa niini nga ‘first time’ niyang makasinati sa gitawag nga recess ug sa sunod buwan pa sa Nobyembre mubalik ang ilang session.
Subay niini, bisan pa kon walay trabaho sa Kamara-Baha apan dili siya muhunong sa tanang trabaho sa Segundo Distrito subay na usab sa iyang baruganan nga “Basta Van-van, always LaVan”.
Sa pikas bahin, si CongW. Vanvan usab ang nahimong pinasidunggang-bisita sa gihimong LGU Family Day sa lungsod sa San Isidro karong bag-o ubos ni Mayor Dadz Gementiza nga gihimo sa Bet-N-Choy resort sa lungsod sa Catigbian niadtong Biyernes.
Samtang human sa maong kalihukan, milupad usab dayon paingon sa Manila si CongW. Vanvan alang sa “BASTA BISAYA MALIPAYON (BBM) DINNER” nga gipasiugdahan ni kanhi Palawan Governor ug karong Cong. Jose Alvarez gabie sa Septyembre 30.
Kauban usab sa kongresista sa maong BBM Dinner ang mga Bisaya nga magbabalaod ug usa niini ang iyang kaubang Bol-anon nga si 3rd District CongW. Alexie ‘Kumbati’ Besas Tutor. (RTB)
