NIPADAYAG og suporta ang ikaduhang labing-labaw nga opisyal sa Bohol sa Senate Bill No. 603 o ang “Safe Bottled Water Act of 2019” nga giduso ni Senador Juan Miguel Zubiri.
Sumala pa ni Bise-gobernador Dionisio Victor A. Balite, Ph.D, nga ang SB 603 nagtinguha sa paghatag og framework nga mag-regulate sa quality standards alang sa bottled waters aron pagsiguro nga ang tanang bottled water nga ibaligya luwas ug haom nga imnon sa publiko.
Matud ni Balite nga ang usa ka mahinungdanong probisyon sa gisugyot nga lakang naghatag alang sa quality standards nga bottled waters, ingon man ang pag-monitor, pag-report, ug pag-inspeksyon niini.
Sigon pa ni VG Balite nga ang tanang katawhan adunay katungod nga maka-access sa limpyo, luwas, ug barato nga tubig-mainom.
Dugang sa bise-gobernador nga importanti kaayu kini aron dili mamilegro ang kinabuhi sa mga katawhan dili lang sa Bohol kon dili sa tibook nasud nga Pilipinhon. (RTB)
