Ni Wilson Auguis Subrio
SAN VICENTE, Dagohoy — Sa dili madugay motunga niining maong barangay niining maong lungsod ang mokabat sa bilyon ka pesos nga investment sa planta sa solar power nga makahatag og 27 megawatts (MW) nga enerhiya.
Kini ang gibutyag kaniadtong Martes, Septiyembre 27, sa kompanyang PetroGreen Energy Corporation (PGEC) atol sa ceremonial launching sa maong dakong proyekto.
Ang maong dakong proyekto maoy pinakauna sa Bohol.
Niingon si Ms. Maria Victoria M. Olivar, Asst. VP for Operations, PetroGreen Energy Corporation atol sa pakighinabi sa mga sakop sa media, nga moabot sa bilyon ang kantidad nga ilang i-invest sa maong solar farm. Wala nihatag si Olivar sa insaktong kantidad sa maong proyekto.
Niingon usab si Olivar nga ang 27MW nga mamugnang enerhiya makaserbisyo og 15,000 ka mga households.
Samtang 22 ka ektaryang yuta ang lun-an sa maong 42,300 solar panels nga may 63 string inverters.
Kon nganong Dagohoy ang ilang gipili ilabina sa Brgy. San Vicente, niingon si Olivar nga ana-a silay upat ka hinungdan: sidlak sa adlaw nga walay makabalda, sayon sa pagkonektar sa NGCP grid nga duol sa maong site, dali ra istoryahon ang mga LGU officials ug abli sa ideya nga magtukod sa maong Dagohoy Solar Power Project.
Ang pag-instalar sa mga solar panels dali ra himuon nga moabot kuno og 4-6 ka buwan ug posibleng ma-operational na kini sa tuig 2024. Environment-friendly ug barato ra usab ang maintenance niini, nga maoy importante mga benepisyo sa maong solar power plant lakip na ang paghatag og daghang trabaho ug makatabang sa social development.
Ang makuhang enerhiya ibaligya ngadto sa National Grid Corporation Power (NGCP) nga maoy kutayan sa kuryente ngadto sa kabalayan, ug mohatag og barato ug limpyo’ng enerhiya.
Ang giproposar nga Dagohoy Solar Power Project (DSPP) proyekto sa Department of Energy (DOE).
‘Daghan ang makabenepisyo’
Gawas nga makamugna kini og daghang trabaho diin prayoridad ang taga-San Vicente ug silingang mga barangay sa maong lungsod, madugangan dili lang ang panudlanan sa lungsod ug barangay lakip na sa probinsya kay ana-a may makolektang buhis ug bahin.
Mokita og P5 milyones ang LGU-Dagohoy ug P3 milyones ang bahin usab sa Brgy. San Vicente, ug kini pulos kada tuig, matud ni Mayor Germinio “Hermie” C. Relampagos, MD.
Si Brgy. San Vicente Kapitan Renato Saguing niingon nga wala na sila’y problema sa mga ahensyang hingtungdan.
Ang PGEC gawas nga makahatag og barato ug limpyo nga enerhiya kon matukod na ang maong planta, apil usab sa ilang ‘commitment’ ang paghatag og suporta sa sektor sa panglawas, edukasyon ug livelihood programs o ang gitawag nilang “HE.L.P.”
“Nalipay mi kaayo sa taga-PetroGreen kay gawas nga ilang gipili ang among barangay, ana-a usab silay scholarshiop program ngadto sa mga estudyanteng nagtungha sa mga state universities, anaay P4K allowance matag buwan lakip na ang book allowance,” matud ni Kap. Saguing.
Niingon usab si Kap. Saguing nga dako og kahigayonan nga mahimong local tourism site ang maong planta.
“Hindi kami nagkamali sa pagpili sa Bohol, sa Dagohoy… Marahil tadhana talaga na mai-launch ang project na ito,” matud ni Mr. Francisco G. Delfin, Jr., Vice President ug COO, PetroGreen Energy Corporation, kinsa niingon nga kaniadto pa’ng Nobiyembre 2019 giduol niya si kanhi kongresista ug karon Gob. Aris Aumentado. Nalangay lamang kuno ang maong proyekto tungod sa pandemya sa COVID-19.
“Ang proyekto na ito ay walang ilalabas na usok, amoy o init,” matud ni Delfin.
“Ang natural na liwanag ng araw mapupunta sa mga solar panels, walang side effects sa pananim, lupa at kabahayan. Ito po ay safe at clean energy project,” pagpasabot pa niya sa katawhan.
‘Gikinahanglang enerhiya sa Bohol’
“100 megawatts ang demand araw-araw. Ang kaya lang maibigay ng mga power plants ninyo dito na umaasa sa Leyte o Cebu ay 54 megawatts lang. Kulang,” butyag ni Delfin.
Nagpasalamat og dako si Delfin ngadto ni Gob. Aris sa pagsuporta nga makasulod sa Bohol ang maong kompanya.
Si Dagohoy Mayor Germinio “Hermie” C. Relampagos, MD, nalipay sa pagka-supportive ni Gob. Aris Aumentado sa maong proyekto.
“More than 100% supportive of this project,” matud ni Dagohoy Mayor Germinio “Hermie” C. Relampagos, MD, kinsa mipasalamat ni Gob. Aris sa dako niining suporta sa maong dakong proyekto.
Si Gob. Aris nalipay usab nga gitinuod sa maong kompanya ang ilang proposal nga magtukod sa maong proyekto dinhi sa Bohol, tulo ka tuig na ang nakalabay.
“Abi nako og binuang ra kay dugay na man to. Tinuod man diay,” matud ni Gob. Aumentado.
“The launch of this solar project is a welcome addition to our efforts of bringing light to Boholano people. Having enough inland sources of energy is what we dream of, and this is one way we can attain this. We consider power as one of the “pillars of development” of this administration, so we take great strides in ensuring that we can offer prospective investors enough amount of energy to sustain their operations and ensure that each Boholano can enjoy the benefits of electricity in each home, schools, commercial establishments and recreation areas,” matud sa gobernador sa iyang speech.
“This project is very much aligned with our vision of a “Green Bohol”, in which progress and environmental sustainability go hand in hand. We believe that development can be achieved without sacrificing the delicate balance that we have with nature.”
“As you proceed with this project, I hope that this is just the start of our collaboration of bringing better lives to the Boholanos. The Provincial Government is always ready to support you in any way we can.
Daghang salamat ug Abante Bohol,” panapos pa sa kanhi three-termer nga kongresista sa Segundo Distrito.
Sa pagka-karon, ang maong kompanya ana-a pa sa permitting stage ug paglihok sa ubang mga dokumentos nga gikinahanglan.
Si Mayor Relampagos, Kapitan Saguing ug Gob. Aris nisiguro sa taga-PetroGreen nga tabangan sila nga mapadali ang palihok sa mga papeles aron masugdan sa dili madugay ang maong importante kaayong proyekto.
Ang maong kalambuan sa Dagohoy kabahin sa panaad kaniadto ni Aris nga himuong “industrial zone” ang Segundo Distrito.
Nitambong usab sa paglusad sa maong proyekto ang presidente sa PetroGreen nga si Milagros V. Reyes, Vice-Mayor Roel Lagroma, ubang mga LGU officials, kapikas ni Mayor Relampagos nga si First Lady Ruby Lagapa-Relampagos, mga opisyales sa Brgy. San Vicente ug mga katawhan sa maong barangay.
