NIPABUHAGAY si Gob. Aris Aumentado sa iyang plano sa Segundo Distrito diin ang iyang amahan ug siya nahimong pulos 3-termer nga kongresista.
Sa dihang gipangayoan siya og reaksyon sa usa sa mga sakop sa media sa Bohol kaniadtong Martes didto sa Brgy. San Vicente lungsod sa Dagohoy atol sa ceremonial launching sa Dagohoy Solar Power Project (DSPP), usa ka solar power plant project sa Department of Energy (DOE) nga himuon sa PetroGreen Energy Corporation (PGEC), usa ka solar power company, kon unsay iyang tubag sa iyang mga ‘detractors’ ug tigsaway, niingon ang gobernador:
“Mubo (ubos) ra mo og tan-aw sa Second District. Sleeping giant ang Second District… Wait and see lang,” matud niya.
Natandog ang gobernador sa maong pangutana ug niingon nga dili niya pasagdan ang Segundo Distrito.
Sa katapusang termino sa pagka-kongresista sa anak nga Aumentado ilabina sa gihungihong kini nga moatbang sa gobernador kaniadtong panahona nga si Art Yap, gibiay-biay og ayo ang Segundo Distrito nga maoy pinaka-pobre sa tulo ka distrito.
Tungod sa maong pagsaway sa iyang mga kritiko ilabina sa iyang mga karibal sa politika, gustong pamatud-an ni Gob. Aumentado nga sayop sila sa ilang pagtuo.
“Bulingon ang ilang tan-aw sa mga tawo sa 2nd District. Pasagdan ra na nato sila. Ato na silang i-surprise,” matud sa batan-ong gobernador.
Kabahin usab sa banat sa mga kaatbang sa politika ug ilang mga dumadapig sa isyu sa daynastiya sa Segundo Distrito, una ng nidepensa ang mga Aumentado nga ilang gipadagan si Van-van aron mapadayon ang iyang mga nasugdang proyekto.
Nitagam na ang mga Aumentado nga ilang gisalig sa kamot sa usa ka politiko ang Segundo Distrito, matud nila.
Ug karon nga silang duha pulos ana-a sa posisyon, hayag nga suporta ang ihatag sa banang gobernador ngadto sa iyang asawa nga magbabalaod sa iyang nadak-ang distrito.
“More on industrial sa 2nd District ug daghang trabaho mosulod…,” matud ni Gob. Aris ngadto sa mga walay salig sa iyang liderato.
“Ang nakalahi nato nila (kritiko ug mga karibal sa politika), agresibo ta. Kamao ta mangita og paagi,” ni Aris pa.
Sa taho nga nigawas, ana-a sa sobra sa 100 ka mga investors ang niduol sa Kagamhanang Probinsyal sa Bohol aron motanyag sa ilang mga serbisyo dinhi sa lalawigan.
Samtang niingon si Aumentado nga ang Puregold nga giingon niya sama sa SM, Robinsons ug Gaisano nga motukod sa ilang negosyo dinhi, moanhi sa Bohol sunod buwan, mobisita sa iyang opisina ug sa kalungsuran.
“Ang Robinson mo-come in pud. Daghan ta og paabuton,” dugang niya.
Suma usab ni Aris, ang ambassador sa Poland magbutang og consular office dinhi sa lalawigan.
“Modaghan ang mga Polish nga mobisita sa Bohol. Makapahimulos ta nila kay mohimo man og mga businesses. Mga kuwartahan man ng mga tawhana,” matud sa gobernador.
“Smart City ang gi-present sa taga-Samsung, sa mga Koreano,” laing maayong balita nga iyang gipaambit sa taga-media.
Gawas usab sa tukurong bilyon nga solar power plant sa Brgy. San Vicente sa lungsod sa Dagohoy, gusto ni Aris nga hatagan og dugang kalambuan ang maong lungsod nga nabutang sa Segundo Distrito.
“Ikaw mayor, mosugot ka nga naay Puregold dinhi sa Dagohoy,” iyang pangutana ni Mayor Germinio”Hermie” C. Relampagos, MD.
Nitubag si Mayor Hermie, “Kinasugutan.”
Niingon usab si Relampagos nga iyang tabangan nga makasulod ang dugang mga investors sa iyang lungsod.
Karon, hagit na ni Gob. Aris ang iyang giingon nga “sleeping giant” ang Segundo Distrito. Nagpasabot kana nga daghang grasya nga moabot sa maong distrito.
Ug dili layo sa kamatuoran nga mo-abante ang ekonomiya sa maong distrito ilabina giablihan ni Aris ang probinsya alang sa mga dagkong negosyante nga gustong motukod sa ilang patigayon dinhi, sukwahi sa gihimo sa nag-una niyang duha ka gobernador.
Suportado usab kaayo niya kini ilabina ang iyang asawa ang naglingkod nga kongresista.
Maong sa taga-Segundo Distrito, magmalaumon ug magmasaligon kita sa gibuhiang saad ni Gob. Aris.
Saksi usab kita kon unsa siya ka-sinsero nga lider sa katawhan sa panahon nga siya mao pa ang amahan sa Segundo Distrito.
Si Kongresista Van-van usab atong nakita nga nagkugi sa Kongreso aron makahatag og dakong pundo alang sa ginsakupang kalungsuran.
Atong suportahan kanunay ang mga lider nga nagtinarong sa ilang gipanumpaan.
Lakip usab niana nga molihok usab kita sa atong kaugalingong kapasidad ug dili ang tanan isandig sa gobyerno.
Ug sa kanunay, i-apil nato sila sa atong mga pag-ampo nga hatagan og dugang kusog, kabaskog ug kadasig aron moserbisyo sa katawhan nga tinud-anay ug kinasing-kasing ug walay buling.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
