GIKABALAK-AN sa mga negosyante og baboy sa Bohol ang pagnihit sa inasal panahon sa Pasko gumikan sa African Swine Fever (ASF) virus nga subling niigo sa Luzon area karong buwana.
Usa ka negosyante og baboy sa merkado publiko ning dakbayan nipadayag nga sa niaging mga buwan karong tuiga nakaplit siya sa kapin sa 100 ka mga baboy.
Apan sukad sa pagtumaw sa ASF, sa iyang pag-adto sa dapit maoy iyang nadala ang 20 na lang kabuok baboy ug gisusi sab niya ang amihanang bahin diin nakadala siya og 15 na lang kabuok.
Samtang tungod kay gidili man nga makasulod sa Bohol ang mga ihawnon nga baboy gikan sa ubang lalawigan, dili kalikayan nga magnihit ang karne sa kamerkaduhan, sigon ni Bokal Lucille Yap-Lagunay.
Matud ni Lagunay nga sa kasamtangan dili pa kini makaepekto sa mga negosyante og karneng baboy sa kamerkaduhan sanglit aduna pa man silay napalit nga mga nagbuhi dinhi. Apan sa paglanat sa mga buwan hayan masinati ang pagnihit sa suplay. (RTB)
