Ni Wilson Auguis Subrio
POBLACION, Trinidad — Isip pagtan-aw sa kaluwasan sa katawhan ilabina dili kalikayan ang bul-og sa tubig kon anaay baha panahon sa bagyo o kusog nga uwan, si Gob. Aris Aumentado nigahin og dakong proyekto sa lungsod sa Trinidad alang sa paghimo og flood control system nga nagkantidad og P69 milyones.
Ang maong proyekto gihatag ni Aris sa panahon nga ana-a pa siya sa katapusang termino isip kongresista sa Segundo Distrito.
Ang maong proyekto, matud niya, gipangayo ni kanhi Mayor Judith del Rosario-Cajes, kapikas ni karon Trinidad Mayor Atty. Roberto “Ondoy” Cajes, kinsa kanhi kongresista usab sa Segundo Distrito (2001-2010) ug kanhi mayor usab sa maong lungsod (2010-2013).
Si Cajes maninoy ni Gob. Aris.
Matud ni Gob. Aris sa taga-Trinidad, “Magkahiusa bisan lain-lain ta og political colors. Padayon ta’ng magtinabangay,” atol sa groundbreaking sa maong proyekto gahapon, Septiyembre 16.
Matud usab sa maong kanhi kongresista, ang maong proyekto maoy “pinaka-importanteng project” kuno ni kanhi Mayor BB Cajes, kinsa iyang maninay.
“Kamong taga-Trinidad, rest assured ana-a kanunay ang among dughan kaninyo,” suma sa gobernador ngadto sa mga Trinidadnon.
Ang maong pundo gikan sa Regular Infrastructure Fiscal Year 2022.
Nagsugod ang maong proyekto kaniadtong Abril niining tuiga ug gilauman nga mahuman sulod sa 312 diyas.
Matud ni Mayor Cajes kaniadtong Septiyembre 1 niining buwana sa pagsaulog sa maong lungsod sa ika-75 ka tuig nga anibersaryo sa pagkatukod, kauban sa maong proyekto ang pagbutang og lugar alang sa desenteng linya sa mga stalls diin ibutang ang mga karenderia sa lungsod.
Ang maong mga karenderia motunga sa duol sa Ipil River sunod tuig, dugang ni Cajes.
Ang groundbreaking sa maong flood control project gipangulohan Gob. Aris Aumentado, Mayor Ondoy Cajes, Segundo Distrito Kongresista Van-van Aumentado, Engr. Ireneo Pondoc, project engineer, LEDA Construction, DPWH II, Brgy. Poblacion Kap. Juanilo “Johnny” G. Orioque ug Brgy. Guinobatan Kap. Esteban “Baning” A. Iba-oc.
Nitambong usab si kanhi Mayor BB Cajes ug kapikas ni Kap. Orioque nga si Madam Jessica Soledad-Orioque.
