Ni Wilson Auguis Subrio
TRINIDAD, Bohol — Ang House Bill No. 4673 o “Postponement of Barangay and SK Elections” nipasar sa Ikaduhang Pagbasa niini didto sa Kongreso.
Si Segundo Distrito Kongresista Van-van Aumentado, kinsa usa sa mga co-authors sa maong Bill, nibutyag niini kaniadtong Martes pinaagi sa iyang Facebook post.
“Gi aproban kini sa Kongreso on its SECOND READING- pasabot duna pay ika 3rd & Final Reading, hopefully nextweek, pero after sa Kongreso isalang pa ngadto sa Senado. Mao paabot lang gyud ta unsay final ani,” matud ni CongW. Aumentado sa iyang FB post.
Ang HB No. 4673 nagpunting nga ang Barangay ug SK Elections (BSKE) nga nalatid sa balaod nga himuon karong Disyembre 5, 2022 ibalhin ngadto sa Disyembre 4 sunod tuig.
Daghang mga magbabalaod ang uyon nga i-oktaba ang maong Eleksyon ngadto sa sunod Disyembre kay bag-o pa’ng nahuman ang local ug national elections kaniadtong Mayo.
Sa pagsabot sa katawhan, ‘yayay’ pa alang sa mga politiko nga i-dayon ang BSKE karong tuiga ilabina sila maoy duolanan sa mga modagan sa maong Eleksyon, aron pangayoan og dugang pundo.
Sa taho sa ABS-CBN News, ang ‘congressional fact sheet’ sa maong balaudnon niingon nga gusto niining dili idayon ang Piniliay karong Disyembre 5 “aron mahatagan og panahon ang Comelec ug mga LGUs nga makaandam og ayo ug maka-apply og ‘corrective adjustments’ sa honoraria sa mga poll workers (sama sa mga magtutudlo).”
Ang maong fact sheet usab nipasabot nga ang maong balaudnon nagmando nga ang sunod BSKE himuon sa unang Lunes sa Disyembre 2026 ug sa mosunod nga 3 ka tuig.
Ilawom usab sa maong bill, ang term of office sa barangay and SK officials nga mapili sa December 2023, magsugod sa udto’ng-tutok sa Enero 1.
Ang maong lakang gi-sponsor-ran ni House Committee on Suffrage and Electoral Reforms chairman Mountain Province Rep. Maximo Dalog alang sa deliberasyon sa plenaryo.
Ang maong bill andam na alang sa pagbotar alang sa final approval sulod sa 3 ka adlaw.
“We need to pass this law ASAP because time is of the essence. The barangay and SK elections is just a few months away so we are hoping that we can approve this in the House on or before October 1,” matud ni House Majority Leader Manuel Jose “Mannix” Dalipe.
“Hopefully, the Senate will do the same so that we can have an approved measure in time for the President’s signature before the election period,” mayid niya sa usa ka pamahayag.
Ang Comelec niingon nga mas modako ang gastuhon kon dili madayon ang BSKE karong tuiga kay magdugang og laing P5 bilyones alang sa dugang nga mga galastuhon sama sa pagparehistro og dugang mga botante, paghimo og daghang balota ug pagpalit og daghang mga ekipo nga gamiton sa maong Piniliay.
Daghang mga ‘watchdogs’ nga una ng nibarog nga i-dayon ang BSKE karong tuiga kay ang pag-oktaba niini maghikaw kuno sa mga botante nga mopili og angayang mga lider sa barangay ug SK.
Una ng gipadayag ang mga katawhan nga wala kaangay ilabina sa ilang mga kasamtangang lider nga matud pa, walay gihimo sa ilang katungdanan ug sige ra og dawat og suweldo.
Dinhi sa Bohol, ang tulo ka mga kongresista nga sila si 1st District Rep. Edgar Chatto, 3rd District Rep. Alexie Tutor ug si 2nd District Rep. Van-van Aumentado uyon nga dili i-dayon ang BSKE karong tuiga.
Ang katapusang BSKE gihimo kaniadtong Mayo 2018.
Ang BSKE himuon unta kaniadtong 2020 apan gi-uswag nga mao unta karong Disyembre 5, 2022, pinaagi sa usa ka balaod.
