Ni Wilson Auguis Subrio
CARMEN, Bohol — Tag P15,000 ang nadawat sa 144 ka Livelihood Assistance Grant (LAG) beneficiaries sa tulo ka lungsod nga mao ang Carmen, Candijay ug Dagohoy ilawom sa Sustainable Livelihood Program (SLP) sa Department of Social Welfare and Development (DSWD) atol sa distribution sa maong livelihood assistance kaniadtong Huwebes sa Grandstand, Poblacion Norte, niining maong lungsod.
Sa 144 ka mga benepisyaryo, 80 niini ang taga-Carmen, 30 taga-Candijay ug 34 taga-Dagohoy o may kinatibuk-ang P2,160,000.00 nga nahatag sa maong adlaw.
“Ayaw gamita sa tong-its, ayaw gamita sa sabong… Gihatag kana sa gobyerno para sa pamilya, dili para sa bisyo. Ayaw intawon ipalit sa alak, druga… Ayaw i-waldas. Gamitin sa tama,” matud ni DSWD Sec. Erwin Tulfo atubangan sa mga benipisyaryo.
Si Nang Maxima Pavon, 61anyos, taga-Barangay Cadapdapan sa lungsod sa Candijay, kinsa usa sa nakadawat sa maong programa sa DSWD, nalipay kay naapil sa maong ayuda.
“Pasalamat kay madugang sa tindahan kay naapektuhan sa pandemic… aron makumpleto para sa apo,” matud niya sa pakighinabi niining tigbalita.
Niingon siya nga dako usab og tabang ang maong ayuda ilabina nagbantay siya sa iyang apo ug ang iyang bana usa ka habal-habal driver.
Niingon usab ang taga-DSWD nga ilang monitoron kon gitunong ba nga gamiton para sa negosyo ang maong kuwarta, ug kon nagkantidad ba og P15,000.
Sulod sa tulo (3) ka buwan, tan-awon nila kon nilambo ba ang negosyo.
Ug human sa usa ka tuig, i-check kon gigamit ba gayud ang maong salapi para sa panginabuhian.
Ang mga LAG beneficiaries kansang mga negosyo o panginabuhian naapektuhan panahon sa pandemya sa COVID-19 gipili sa mga Project Development Officers sa ilang area.
Ang maong mga benepisyaryo usab gipili kay wala naapil sa ‘recovery ug rehabilitation projects’ sa ubang national agencies.
Ang maong kalihukan gitambungan nila ni Gob. Aris Aumentado, Bise-Gobernador Dionisio Victor Balite, 3rd District Board Member Nathaniel Binlod, Garcia-Hernandez Mayor Jess Baja, DSWD-7 Regional Director Shalaine Marie S. Lucero ug Carmen Mayor Conchita “Che-Che” Toribio-de los Reyes, kinsa nagpasalamat ngadto ni Sec. Tulfo sa maong programa.
