SAMA sa uban natong kaigsoonan, apil pud ko’s nasakitan sa gisulti ni DSWD Sec. Erwin Tulfo kaniadtong Huwebes didto sa lungsod sa Carmen atol sa distribution sa livelihood assistance ilawom sa Sustainable Livelihood Program (SLP) sa maong ahensya.
Sakit ang maong gibutyag ilabina aktwal kong nakadungog sa iyang gisulti kay ni-cover man ko sa maong event kauban ang ubang sakop sa media sa Bohol. Gani, duha ka news articles ang akong gihimo ug napatik niining pamantalaan gahapon.
Good news kay nakadawat man og tag P15,000 matag usa ang 144 ka benipisyaryo sa Livelihood Assistance Grant (LAG) nga taga-Carmen, Candijay ug Dagohoy.
Ang bad news mao ang bahin sa P5k sa Odette o ang gitawag nga ayuda o DAFAC.
Ug sa educational assistance usab, dili gayud kuno tanan ang mahatagan matud ni Tulfo.
Sa DAFAC, daghan gayud ang nilaum. Silang mama, nilaum pud kay nifill-up man. Labaw pud kong nilaum, kay nifill-up pud ko. Kay lage apektado man. Di man ta dato.
Gani, sa hinapos nga bahin sa Agosto, daghan ang nalipay kay niingon si Segundo Distrito Kongresista Van-van Aumentado nga karong buwana ihatag ang P5k sa mga wala pa kadawat.
Daghan pa ang wala kadawat. Sobra sa 100,000 ka mga benipisyaryo ang nagpaabot sa wala.
Akong gisuginlan si CongW. Aumentado pinaagi sa chat, ug niingon siya nga “Wala ta’y mahimo ana” kay mao man kuno ang sulti sa undersecretary sa DSWD sa niaging buwan, ug mao ra usab ang iyang gipaabot sa katawhan.
Grabe ang yawyaw sa katawhang Bol-anon nga wala kadawat. Ubay-ubay pa gayud ang naghuwat kay 17 pa man ka lungsod ang wala mahatagi sa maong ayuda.
Kahinumduman nga si karon kanhi Presidente Rodrigo Duterte niingon nga ang tanan (nga apektado sa Bagyong Odette) makadawat ug gi-download na sa mga LGUs ang maong salapi.
Ang pangutana: Namutbot ra diay ang kanhi Presidente? O gigamit ang maong kuwarta sa pagtabang sa laing mga benipisyaryo? Unsa man?
Daghan ang naglibog. Daghan ang nasuko. Daghan ang nanghoy ang abaga sa maong balita.
Anaay nagbagulbol nga nasayang ra kuno ang ilang oras sa pag-fill-up sa DAFAC form.
Anaay niingon nga hinay g’yud kuno ang mga lider sa Bohol. Kay sa ubang probinsya nga dili kaayo apektado sa maong bagyo, dugay ra nga nakadawat.
Anaay niingon nga dako ra kuno ang P15k nga gihatag sa mga LAG beneficiaries.
Diri sa Trinidad, wala usab kadawat (sa DAFAC). Pero ang lungsod sa Talibon, kon wa ko masayop, sa buwan sa Hunyo nakadawat sila.
Sa 17 ka mga lungsod nga wala pa kadawat, kinsa man ang mabasol? Ang mayor ba, ang MSWDO ba o ang taga-DSWD?
Anaay niingon nga ang ubang mga lider sa lungsod namolitika sa paglista sa mga form maong nadugay ang pagproseso sa maong mga papeles ug rekisitos.
Ang uban gipapirma daan aron madali kuno ang pagrelease. Apan nabali nuon kay gawas nga nadugay, dili na man makadawat kay walay budget.
Niingon si Sec. Tulfo nga saad kuno sa niaging administrasyon (Duterte) ang maong ayuda sa Bagyong Odette, ug niingon siya nga iyang buhaton ang iyang mahimo aron mahatag kini.
Mangayo kuno siya sa Kongreso pero budget na para sa sunod tuig. Ang pangutana: makadawat pa ba ang 17 ka lungsod dinhi sa Bohol?
Sa interview man gud sa media kaniadtong Huwebes, duha ra sa among mga kauban ang nakapangutana. Dali ra kaayo ang pakighinabi. Ug paghuman, nilakaw na si Tulfo paingon sa Tagb. kay anaay tambungan nga mga aktibidades.
Ang uban niingon nga dili na lang g’yud magsalig sa gobyerno ug magmove-on na lang.
Pero ang atong mensahe sa ahensyang hingtungdan, nga unta patas ang paghatag. Dili makatarunganon nga 17 pa ka mga lungsod ang wala kadawat.
Pero mao na man lage kuno, paabot na lang ta kon naa pa’y moabot nga hinabang, sa pagka-karon, manikaysikay sa lang ta. Ug dili gihapon magpakawala sa paglaum.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
