Ni Wilson Auguis Subrio
CARMEN, Bohol — Daghang nagbagulbol kaniadtong Huwebes ug hangtud karon ilabina sa social media sa gibutyag ni DSWD Sec. Erwin Tulfo nga wala na’y pundo alang sa ayuda sa mga biktima sa Bagyong Odette dinhi sa Bohol karong tuiga.
Mao kini ang gipahibawo ni Sec. Tulfo atol sa distribution sa livelihood assistance sa Livelihood Assistance Grant (LAG) beneficiaries ilawom sa Sustainable Livelihood Program (SLP) sa Department of Welfare and Development (DSWD) kaniadtong Huwebes sa Grandstand, Poblacion Norte, niining maong lungsod, atubangan sa mga sakop sa Bohol media.
Nagkagubot ang mga netizens sa maong ‘bad news’ ilabina daghan ang naghuwat ug nagdahom nga makadawat sila sa maong ayuda.
“Paasa man kaayo ang taga-DSWD. Istorya ra’y nagdaghan,” matud sa usa ka netizen.
“Asa ra man diay ang giingon ni kanhi Presidente Rodrigo Duterte nga gi-download na sa mga LGUs ang maong ayuda?”, pangutana sa laing netizen.
“Ingon karong September ihatag? Wa’y klaro diay!,” matud usab sa laing netizen.
Anaay niingon nga dili na lang g’yud kuno isalig sa gobyerno ang tanan.
Samtang gipaagi na lang sa uban og pakatawa ang nahugno kuno nilang paglaum.
“Hahahaha nagsayang-sayang ra diay mi og pa-picture ug fill-up ato (DAFAC form).”
Niingon ang maong kalihim nga ilang gitan-aw ang nahabiling budget karong tuiga, ug nasuta nga wala maapil ang pundo alang sa mga biktima dinhi sa maong bagyo.
“Promise kasi yan ng previous administration, kailangan nating tuparin yan,” ni Tulfo pa.
“When I looked at the budget, wala man na sa budget namo. When I asked DBM Sec. Pangandaman, ingon niya sir, wala man sa earmark nato this year kay typhoon man na”, matud sa kalihim.
“The best way to do is moadto ko sa Congress ug mangayo ko para ana. Nung nagtanong si Gov. Aumentado tungkol dyan, sabi ko wala koy mahatag nimo nga at least P700 million for Bohol. Sasabihin ko sa mga congressman natin. Ang tibuok rehiyon, nagkinahanglan og P1.2 billion alang sa maong katuyoan,” dugang pa niya.
Sa pagka-karon, ana-a pa’y 17 ka mga lungsod sa Bohol ang wala pa makadawat sa ayuda alang sa mga biktima sa Bagyong Odette.
Apan niingon si Tulfo nga maningkamot siya para sa sunod tuig.
“Ang akong himuon, mangayo ko sa Congress, para sa sunod tuig.”
EDUCATIONAL ASSISTANCE
Sa educational assistance, “Duna pa ta’y duha ka Sabado. Pero dili g’yud tanan matagaan. Kadto lang naa sa crisis situation”, pagpasabot ni Tulfo.
“Human sa Sept. 24, ato nang i-download ngadto sa mga distrito ang pag-apud-apod sa assistance. Wala man ko nag-ingon nga ang tanan hatagan. 20 million students gud na. Asa man ta’g pundo ana? Kadto ra’ng in crisis situation ang mahatagan,” dugang pagpasabot sa kalihim.
