MATUD sa manunulat nga taga-Glastonbury, United Kingdom nga si Palden Jenkins adunay napulo ka lagda sa pagkatawo kon Ten Rules For Being Human. Og kini ang mosunod:
Una, maka-angkon ka og lawas. Kining lawasa mahimong imong magustuhan o dili, apan mao na kana ang imong lawas niining kinabuhi-a.
Ikaduha, makat-on ka og mga pagtulun-an. Ania ka isip usa ka estudyante sa kinabuhi og full-time ang imong pag-eskwela. Dinhi sa tunghaan sa kinabuhi, matag adlaw aduna kay kahigayonan pagkat-on sa mga pagtulun-an. Mahimong ganahan ka sa mga pagtulun-an (lessons). Posible usab nga alang kanimo tinunto ug way kapuslanan ang mga lessons.
Ikatulo, walay kasaypanan niining eskwelahana, pagtulun-an ra. There are no mistakes, only lessons. Ang paglambo usa ka proseso sa experimentasyon o trial and error. Ang dili molampus nga mga experimento sama ra usab ka-importante sa mga milampos nga experimento kay kini mahinungdanong tipik sa tibuok proseso.
Ika-upat, ang pagtulun-an magbalik-balik hangtud nga makat-on ka. Ang lessons magbalikbalik sa nagkalain-laing panagway ug porma hangtud nga makat-onan nimo ang iyang gihambin nga pagtulun-an. Kung makat-on ka na sa usa ka lesson, mouswag na pud ka sa sunod ug lahing pagtulun-an.
Ika-lima, ang pagkat-on walay katapusan. Learning lessons does not end. Walay parte sa kinabuhi nga walay nahilakip nga pagtulun-an. Samtang buhi ka, adunay daghang pagtulun-an alang kanimo.
Ika-unom, ang “didto” ug” diri” parehas ra. ‘There’ is no better than ‘here’. Busa dili ikatandi ang imong sitwasyon ug lugar sa uban. Pananglitan, aduna kay gustong kab-uton nga butang o gustong adtoon nga lugar, kon makab-ot mo na ang butang o maadto ang lugar, aduna na usab kay laing gustong kab-uton o adtoon.
Ika-pito, ang uban salamin ra nimo. Others are merely mirrors of you. Busa, mahimo mo lang kasilagan o higugmaon ang bisan unsang imong makita sa uban tungod kay kini nagsalamin lamang sa unsay imong gikasilagan o gihigugma diha sa imong kaugalingon.
Ika-walo, ikaw ra’y mag-igu og unsaon nimo ang imong kinabuhi. What you make of life is up to you. Anaa na kanimo ang tanan mo’ng gikinahanglan alang niining kinabuhia – kon unsay imong buhaton, ikaw na’y mag-igu. Anaa kanimo ang katungod pagpili.
Ika-siyam, ang tubag sa tanang mo’ng pangutana anaa sa imong kaugalingon. The answers lie inside you. Ang angay mo lamang buhaton mao ang pagtataw, pagklaro, pagpaminaw, ug pagsalig.
Ika-napulo, mahikalimut ka niining tanan!
