IPADAYON sa Department of Agriculture (DA) ang pag-apod-apod niini og P5,000 ngadto sa mga gagmay nga mag-uuma sa Bohol isip kabahin sa nationwide cash assistance program niini.
Matod sa Bol-anong assistant secretary sa DA-Visayas Atty. Salvador ‘Salva’ Diputado, Ph.D nga mokabat sa 90,000 ka mag-uuma sa probinsiya ang makadawat sa maong kantidad sugod karong buwana kung mahapsay lang ang tanang papeles.
Gipasabot ni Diputado nga ang cash assistance nga mokabat sa kinatibuk-ang P350 milyones, gilusad pinaagi sa Republic Act (R.A.) No. 11598 nga gilagdaan isip balaod ni kanhi presidente Rodrigo Duterte niadtong Disyembre 2021.
Sumala sa opisyal nga gitugotan sa balaod ang DA nga makakuha og pundo gikan sa sobra sa P10 bilyones gikan sa Rice Competitiveness Enhancement Fund (RCEF) aron direktang mahatagan og cash assistance ang gagmay nga mga mag-uuma hangtod sa tuig 2024.
Dugang ni Diputado nga ubos sa programa, ang gagmay nga mga mag-uuma nga nagtikad sa duha ka ektarya nga yuta sa humay makadawat sa tinuig nga direktang tabang-salapi.
Naayran niini nga mokabat sa 50,000 ka mag-uuma sa Bohol ang nakadawat sa cash assistance sa unang hugna sa distribution gikan niadtong Enero hangtod Mayo ning tuig.
Matod pa ni Diputado nga e-priority kadtong wa pa kadawat apan pananglitan naa pay daghan bakanti, kadtong mga makadawat sauna pwede gihapon hatagan karon basta e-endorse sila sa ilang mga municipal agriculturist diin sila usab ang mu-verify sa kwalipikadong makadawat.
Miingon si Diputado nga ilang gisalig sa mga municipal agriculturists ang pag-evaluate sa mga recipient kay naa man sila sa lugar o lungsod. (RTB)
