“MAS progresibong Ubay,” kini maoy pagdasig ug panglantaw ni Governor Aris Aumentado para sa mga Ubayanon atol sa pagsaulog sa ilang ika-175 nga founding anniversary kaniadtong Siteymbre 1, 2022.
Si Aumentado mao ang nihatag sa ‘keynote address’ sa pagsaulog karong tuiga sa Ubay founding anniversary program didto sa Ramon Magsaysay Gym Poblacion, Ubay.
Ang lungsod sa Ubay ang nakamugna napod og laing Ubaynon nga maoy Gobernador sa Bohol nga mao si Aumentado human ni kanhi Governor ug Congressman Erico Aumentado nga iyang amahan.
Makasaysayon usab alang sa Ubay kay ang kapikas sa kinabuhi ni Governor Aris Aumentado nga si First Lady Vanessa Aumentado mao ang Congresswoman sa segundo distrito.
Wala pakyasa ni Governor Aumentado ug Congresswoman Aumentado nga makatambong, nipahalipay ug niduyog gyod sa 175th founding annniversary sa ilang lungsod bisan pa man sa kabusy sa ilang panahon ug schedule.
“Kanunay kaming anaa sa inyong tapad, mutapad ug muabag para sa kanunay’ng mu-abante ang atong lungsod sa Ubay,” sigun ni Governor Aumentado.
Gitambongan sab ang kalihokan ni 2nd District Board Member Atty. Jamie Aumentado Villamor nga taga Ubay usab, Department of Agriculture Regional Director Region 7 Joel Elumba nga guest speaker ug ang kagamhanang lokal pinangulohan ni Mayor Costan Reyes ug mga sakop sa Sangguniang Bayan ubos ni bise-mayor Victor Bonghanoy.
TRINIDAD FOUNDATION DAY
Samtang nipahalipay usab si Governor Aris Aumentado sa lungsod sa Trinidad sa ilang ika-75 nga foundation day sa managsamang adlaw.
Ang gobernador mao ang pinasidunggang dinapit sa pagsaulong karong tuiga nga Diamond Jubilee celebration na ang lungsod sa Trinidad.
“Ipadayon ang inyong panglantaw sa dakong ugma sa inyong lungsod sa Trinidad kay anaa kami moduyog kaninyo kay kami man ang inyong gisaligan ug kami usab nisalig kaninyo sa inyong panaghiusa nga maoy maghatag og kusog nga makaugmad ug maangkon ang kalamboan sa lungsod,” sigun ni Governor Aumentado.
Si Governor Aumentado wala gyod nagpasagad sa Trinidad bisan sa iyang kataposang termino pagka Congressman nagbilin kini og P69 milyones nga proyekto.
Karon nga siya na ang gobernador sa Bohol suportahan niya ang Corn and Cassava farmers nga makadawat og daghang equipo para sa ilang mga pahinganlanon. (RTB)
